Qazaqstannyń Konstıtýsıalyq soty azamattyń mısıonerlerdi tirkeý talaptaryn belgileıtin zań normalarynyń konstıtýsıalylyǵyn tekserý týraly ótinishin qarastyryp, olardy Konstıtýsıaǵa sáıkes dep tanydy, dep habarlaıdy Dalanews.kz.

“Konstıtýsıalyq sot Qazaqstan Respýblıkasynyń Konstıtýsıasyna sáıkes kelýi turǵysynan azamattyń ótinishin qarastyrdy. Ótinishte “Dinı qyzmet jáne dinı birlestikter týraly” zańnyń 1-babynyń 5) tarmaqshasy men 8-babynyń 1-tarmaǵy jáne Ákimshilik quqyq buzýshylyq týraly kodekstiń 490-babynyń úshinshi bóligi kórsetilgen. (…) Konstıtýsıalyq sot atalǵan zań normalaryn Qazaqstan Respýblıkasynyń Konstıtýsıasyna tolyq sáıkes dep tanydy”, – delingen habarlamada.

Ótinish berýshi tirkeý talaby onyń ar-ojdan jáne sóz bostandyǵyna quqyǵyn shektep, dinı ilimdi taratýyna kedergi keltiretinin alǵa tartty. Alaıda sot mısıonerlerdi tirkeý rásimi dinı birlestikterdiń ózin-ózi retteý mehanızminiń bir bóligi ekenin jáne dinı erkindik pen qoǵamdyq múddeler arasyndaǵy tepe-teńdikti saqtaýǵa baǵyttalǵanyn atap ótti.