Qazaqstanda usynylyp otyrǵan Konstitýtsiia jobasyndaǵy birqatar baptardan «rýhani-adamgershilik qundylyqtar» degen uǵym alynyp tastaldy. Bul týraly Konstitýtsiialyq komissiia múshesi, jýrnalist Ádil Baltabaev málimdedi, dep habarlaidy Dalanews.kz.
Onyń aitýynsha, atalǵan uǵym Konstitýtsiianyń 12, 20 jáne 32-baptarynan alynyp otyr. Bul baptarda sóz bostandyǵy, adam quqyqtary men bostandyqtary, sondai-aq beibit jinalystar ótkizý quqyǵy qarastyrylǵan.
Ádil Baltabaev Konstitýtsiialyq komissiia jumysynyń alǵashqy kúnderinen bastap bul terminge qatysty kúmán bolǵanyn atap ótti.
«Biz komissiia ishindegi alǵashqy kúnderden bastap bul uǵymnyń tym aýqymdy ekenin aityp keldik. Ol qosarly túsindirýge jol ashty, sol sebepti qoǵamda keń talqylaý týyndady», – dedi ol.
Onyń aitýynsha, dál osy belgisizdik azamattardyń negizgi quqyqtary men bostandyqtaryna shekteý qoiý qaýpin arttyrǵan.
Komissiia jumysy barysynda Ádil Baltabaev Karlygash Jamankýlova, jýrnalist áriptesteri jáne basqa da komissiia múshelerimen birge bul uǵymdy Konstitýtsiiadan alyp tastaý nemese halyqaralyq quqyq normalaryna sáikestendirý qajet ekenin birneshe ret kótergen.
«Biz birizdi túrde: ne bul uǵymdy tolyq alyp tastaý kerek, ne ony halyqaralyq quqyqqa sai keltirý qajet dep talap ettik», – dep jazdy ol.
Nátijesinde komissiia músheleriniń ýáji eskerilgen.
Endi Konstitýtsiia jobasynda «rýhani-adamgershilik qundylyqtar» ornyna «qoǵamdyq moral» (public morality) terminin qoldaný usynylyp otyr.
Ádil Baltabaevtyń aitýynsha, bul – halyqaralyq deńgeide moiyndalǵan quqyqtyq uǵym.
«Public morality – adam quqyqtary jónindegi negizgi halyqaralyq qujattarda, sonyń ishinde BUU-nyń Azamattyq jáne saiasi quqyqtar týraly halyqaralyq paktinde bekitilgen túsinik», – dedi ol.
Jýrnalist bul sheshimdi Konstitýtsiialyq komissiia jumysynyń mańyzdy jetistigi retinde baǵalady.
«Bul – dialogtyń, kásibi pikirtalastyń jáne dálelge negizdelgen jumystyń nátijesi. Mańyzyn asyra aitpai-aq qoiaiyn, bul – printsipti sheshim», – dep atap ótti ol.
Sóz sońynda Ádil Baltabaev áriptesterine alǵysyn bildirdi.
«Alǵashqy kúnnen bastap printsipti ustanym tanytyp, odan taimaǵan Karlygash Jamankýlovaǵa jáne barlyq áriptesterime shynaiy alǵysymdy aitamyn. Sondai-aq Konstitýtsiialyq komissiia basshylyǵyna tyńdai bilýge jáne konstrýktivti jumysqa daiyn bolǵany úshin rahmet», – dedi ol.
