Komissiia músheleri: Aralyq sheshim – jerdi 49 jylǵa jalǵa berýdi Parlamentke usyný kerek
Otyrysta sóz alǵan Komissiia múshesi, jumys tobynyń jetekshisi Dos Kóshim, qazirdiń ózinde belgili bir aralyq sheshim shyǵarýǵa bolady dep esepteidi.
«Meniń oiymsha, bir aralyq sheshim shyqty jáne ony Parlamentke berý kerek siiaqty. Ol – jerdi jalǵa berýdi qaita ashýymyz kerek. Óitkeni, qazir jerdi jalǵa berý toqtatyldy ǵoi. Osy jerde sóilegen azamattardyń báriniń bir núkteden qosylǵan jeri – jerdi 49 jylǵa jalǵa berýdi ári qarai jalǵastyrý qajet. Eshkim osyǵan qarsy bolǵan joq, qaita báriniń aitatyny osy. Osyny bizdiń aralyq sheshim retinde Parlamentke berýge bolady», – dedi Dos Kóshim.
Budan bólek, komissiia múshesiniń aitýynsha, investitsiia men jerdi sheteldikterge jalǵa berý máselesin shatastyrmaǵan jón.
«Meniń amerikalyq bir joldasym «1 mln dollar investitsiia bersem, bes jyldan keiin jyl saiyn maǵan 100 myń dollar qaitaryp tura ma?» dep suraidy. Ol investitsiia salyp, sodan paida tabamyn deidi. Al bizdiń qazir aityp jatqanymyz - jerdi sheteldikterge jalǵa bermeý máselesi. Bárin anyqtap alaiyq. Investitsiia salý men jalǵa berýdiń basyn ashyp alaiyq», – dedi ol.
Dos Kóshimniń osy usynysyn, Komissiiadaǵy taǵy bir jumys tobynyń jetekshisi Muhtar Taijan da qoldady. Ol da jerdi qazaqstandyqtarǵa 49 jylǵa jalǵa berýdi qoldaidy jáne ony Parlamentke usynys retinde engizýge bolady dep esepteidi. Tek jeri tym kóp, latifýnditerge qatysty óz pikirin aitty.
«Jeri 100 myń gektardan asyp jatqan latifýndisterge shara qoldaný kerek. Ol qandai? Mysaly, jerdi jalǵa bergende nemese satqanda belgili bir shekteý bolýy kerek. Eger sol shekteýden 2 ese kóp jer alsa, salyqty da 2 esege kóbeitý kerek, úsh ese kóp pe, onda salyqty da úsh esege kóterý kerek. Mine, sonda biz latifýndisterdi de baqylap ustai alatyn edik», – dedi M.Taijan.
Aiymgúl ÁBILEVA
Derekkózi: BNews.kz
