Endi turǵyndar toq kóziniń ózine aqshany eki ese jumsamaq. Ásirese, kóp balaly otbasylar men zeınetkerler jańa tarıfter qaltaǵa aýyrtpalyq túsiredi dep qynjylady.
– Qazir elektr qýatyna 7-8 myń tólep júrmin. Endi kóterilse 10-12 myńǵa deıin tóleımin. Bizder zeınetkerlerge, kóp balaly otbasylarǵa qıyn bolatyn túri bar, – deıdi zeınetker Shıhy Orynbaev.
Aqtaý turǵyndary elektr energıasynyń 1 kVt- na qazir 12 teńge 78 tıyn tólep otyr. Al, qala irgesindegi eldimekende turatyndar ár kılovatyna 15 teńge 52 tıyn shyǵyndaıdy. Zańdy tulǵalar úshin 24 teńge. Baǵa endi 7,5 paıyzǵa artady. Sý, jylý, kógildir otyn quny da óńirde 10 paıyzǵa kóterilmekshi.
– Qazir zaıavkalar túsip jatyr. Iaǵnı, bizge tarıfti 5-10 paıyzǵa deıin kóterý jóninde suranys kelip túsip jatyr. Biz sheshimdi endi qabyldaımyz, – deıdi Mańǵystaý oblysy boıynsha Tabıǵı monopolıalardy retteý departamenti basshysynyń orynbasary Baqytbek Muratov.
Komýnaldyq qyzmet kórsetetin mekemelerdiń usynysy bekitilip úlgerdi. Turǵyndar jańa jyldan bastap jańa tarıfke kóshti.
Seriktestikter tasymaldaý shyǵynynyń kóbeıýine baılanysty baǵany ósirýge májbúr. Turmystyq qatty qaldyq boıynsha da jańa tarıf belgilendi. Osy jyldyń 15 aqpanynan bastap qoqys shyǵarýǵa tólenetin aqy adam basyna shaqqanda 179 teńge 58 tıyn. Al, suıytylǵan gaz baǵasy ózge oblystarda 14 paıyzǵa deıin artsa, Aqtaýda turaqty. Gaz quıý beketterinde ár lıtri qazir 35 teńgeden satylyp jatyr. Mamandardyń aıtýynsha, Mańǵystaý óńirine bekitilgen shektik baǵa osy aıda qymbattaýy múmkin.
Derekkózi: 31 arna
