«Kólsai kólderi» memlekettik ulttyq tabiǵi parki qyzmetkerleri «Taza Qazaqstan» ekologiialyq aktsiiasy aiasynda Saty aýylyndaǵy A.Túrkebaev atyndaǵy mektep-litseiiniń oqýshylaryna arnaiy dáris ótip, aǵash kóshetteriniń tuqymdaryn arnaiy ydystarǵa otyrǵyzyp, kútip-baptaý jumystaryn úiretti.
Ulttyq park direktory Elnur Ahmetovtyń aitýynsha «Taza Qazaqstan» respýblikalyq ekologiialyq aktsiiasy boiynsha 2025 jyly 356 is-shara ótkizý josparlanǵan. Onyń biri – mektep oqýshylaryna Ulttyq park aýmaǵynda ósetin Shrenk shyrshasynyń tuqymyn ósirý týraly aqparat berýge arnalǵan dáris.
«Barlyq igi is jastarǵa tálim-tárbie berýden bastalady. Bizdiń Ulttyq park balabaqsha, mektep, kolledj, ýniveersitettermen jyl saiyn tyǵyz qarym-qatynasta jumys jasaidy. Aýdan ǵana emes, oblys, respýblika kóleminde biraz mekteptermen birlesken jobalardy júzege asyrýdamyz. 5-6 mektepte «Ormashylyq mektepteri» bar. Onda 30-dai oqýshy qosymsha bilim alady. Olarǵa 600-dei shrenk shyrshalaryn berdik. Búgingi aktsiia, dáris barysynda tuqymdar qalai jinalady, kóshetter qalai otyrǵyzylady, qalai kútip-baptalatynyn túsindirdik. Olar ary qarai sabaq barysynda zerttep, qalai ósetinin baqylai alady. Osylaisha biz ekologiialyq bilim berýden bastap, ǵylymi zertteýge qyzyǵýshylyǵyn arttyrýǵa deiin jetkizýge kúsh salýdamyz», deidi Elnur Ahmetov.
«Taza Qazaqstan» ekologiialyq aktsiiasy aiasynda ótken dáriske qatysqan A.Túrkebaev atyndaǵy mektep-litseiiniń oqýshylarynyń aitýynsha Ulttyq park uiymdastyrǵan dárister óte qyzyqty ótedi. Óitkeni aitylǵannyń bárin kózben kórip, qolmen ustaýǵa múmkindik bar.
«Bizdiń aýylda shrenk shyrshasy ósedi. Kúndelikti kórip júrsek te ol qalai ósedi, qalai kútip-baptaý kerek, kóp aqparatty bile bermeimiz. Búgingi aktsiia, dáris aiasynda kóptegen aqparat aldyq. Kóshetterdi qolymyzben ustap kórdik. Endi ony kúndelikti dáris kezinde kútip-baptaýdy jalǵastyramyz. Ulttyq park mundai sharalardy jii ótkizedi. Bizge unaidy. Biz óz otanymyzdy, óz jerimizdi, tabiǵatymyzdy qorǵaýymyz kerek», - deidi 9 synyp oqýshysy Zańǵar Qyryqbaev.
Aita keteiik, «Kólsai kólderi» aýmaǵynda jyl saiyn 13 ga orman ekpeleri egiledi jáne 3 ga ýaqytsha tuqymbaqta orman ekpelerin ósirý jumystary júrgiziledi. Tuqymbaqtaǵy kóshetter 4 jyldan taýly aimaqtarǵa egiledi. 2024 jyly Parktiń 13,7 ga. aýmaǵyna 95 520 dana shrenka shyrshasynyń kóshetteri otyrǵyzylǵan. Ýaqytsha orman tuqymbaǵynda 113 400 dana shrenka shyrshasynyń jas kóshetteri ósirilýde.
Ulttyq park direktory Elnur Ahmetovtyń aitýynsha «Taza Qazaqstan» ekologiialyq aktsiiasy boiynsha ótkiziletin is-sharalar jyl boiy jalǵasady. Onyń aiasynda mektepter men JOO-da ekologiialyq mádenietti qalyptastyrý, qorshaǵan ortany qorǵaýǵa bailanysty aǵartýshylyq jumystaryn júrgizý, ekologiialyq bilim berý, «Taza aýla – taza aýyl», «Úzdik ekologiialyq bilim berý uiymy» konkýrstaryn ótkizý, jáne BAQ men áleýmettik jeli arqyly nasihattaý jumystary josparlanǵan.
«Taza Qazaqstan – bul elimizde qorshaǵan ortany qorǵaý, ekologiialyq máselelerdi sheshý jáne tabiǵatty saqtaý maqsatynda júzege asyrylyp jatqan ulttyq mańyzy bar bastamalardyń biri. «Ulttyq parkter» bul bastamany qoldaý, júzege asyrýda aldyńǵy qatarda bolýy kerek», deidi Elnur Ahmetov.
