A. Abatovtyń aitýynsha, zaýytqa germaniialyq, shvedtik, ýkraindyq jańa qural-jabdyqtar ornatylǵan. Tsentrifýgalar, vakýýmdyq apparattar, bý stansalary aýystyrylyp, tastan tazalaýshy qurylǵy qoiylǵan. Tehnologiialyq protsester tolyǵymen avtomattandyryldy. Sonyń nátijesinde ótken jyly zaýyttyń óndiristik qýaty táýligine shamamen 1600 tonnany qurasa, biylǵy jyly táýligine 2000-2200 tonnaǵa jetti. Sondai-aq mazýt tutyný mólsheri 40 %-ǵa azaidy. Oblys ákimi qyzylsha jinaý alańyna da jańa qurylǵylar ornatylǵanyn kórdi.
Munda shikizatty 5 qyzylsha túsiretin mashinalar qabyldap alyp, alańǵa tógedi. Bul mashinanyń 2-eýi – jańa, germaniialyq tehnika. Jýyq arada mundaǵy tehnika taǵy bir mashinamen tolyqpaq. Sońǵy 3 jylda investorlar zaýytty jańǵyrtý jumystaryna 3,5 mlrd. teńge jumsaǵan.
A. Abatovtyń habarlaýynsha, biylǵy maýsymda qant qyzylshasyn qabyldaýdy zaýyt 20 qyrkúiekte bastaǵan. Al 5 qazanda maýsymnyń alǵashqy qanty óndirildi. Qazirgi kezde 44 myń tonna qant qyzylshasy qabyldandy. Jalpy zaýyt 200-220 myń tonna qabyldaýdy josparlap otyr.
– Jańa tehnikanyń arqasynda zaýyt bir kezekte 6 myń tonna tátti túbir qabyldai alady. Keshe ǵana 4,5 myń tonna qabyldandy, – dep atap ótti kásiporyn direktory.
Zaýytqa barǵan saparyn qorytyndylaǵan oblys ákimi A. Batalov:
– Qazirgi kezde oblys boiynsha qant qyzylshasynyń ónimdiligi gektaryna 350 tsentnerden ainalyp otyr. Jekelegen sharýa qojalyqtary ár gektaryna 700-800 tsentnerden alyp otyr. Qolda bar múmkindikterdi paidalana otyryp, topyraqtyń qunarlylyǵyn, zamanaýi agrotehnologiiany esepke ala otyryp, biz kelesi jyly ónimdilikti 400-450 ts/ga deiin ulǵaita alamyz. Al irrigatsiialyq júielerdi tolyq qalpyna keltirgennen keiin kórsetkish 450-den kem bolmaidy, ári ol turaqty kórsetkishke ainalýy tiis, – dedi.
Jalpy Almaty oblysynyń qantqa degen qajettiligi jylyna 37 myń tonnany quraidy.Biylǵy jyly bul qajettilikti tolyqtai jabýǵa múmkindik bar: Kóksý qant zaýyty 20 myń tonna qant shyǵarsa, Aqsý qant zaýyty 10 myń tonna óndirýdi josparlap otyr. Munan keiingi kezeńde Aqsý qant zaýyty tolyq qýatyna shyqqanda maýsymyna 300 myń tonna shikizat óndire alady. Al Kóksý qant zaýyty 250 myń tonna, odan ári 300 myń tonna jobalyq qýatyna shyǵýǵa múmkindigi bar. Máselen, ótken jyly 560 sharýa qojalyǵy qyzylsha ósirýmen ainalyssa, biylǵy jyly olardyń sany 780-ge jetken.
Almaty oblysy ákiminiń baspasóz qyzmeti
