Kókshetaý qalalyq sotynda óziniń búiregin satýǵa baǵyttalǵan zańsyz mámile jasaýǵa oqtalǵany úshin turǵynǵa qatysty qylmystyq is qaraldy, dep habarlaidy Dalanews.kz.
2026 jyldyń qańtarynda Almaty oblysynyń 34 jastaǵy turǵyny áleýmettik jelide óziniń búiregin satý týraly habarlandyrý jariialaǵan. Habarlandyrý jariialanǵannan keiin Kókshetaý qalasynyń turǵynynan usynys túsken, ol zańsyz mámileni áshkereleý maqsatynda politsiiaǵa erikti túrde járdemdesti.
2026 jyldyń aqpanynda turǵyn meditsinalyq tekserýden ótý jáne mámile jasaý úshin Kókshetaý qalasyna kelgen, alaida jalǵan satyp alýshydan aqshanyń bir bóligin alý kezinde politsiia qyzmetkerlerimen ustalyndy.
Sotta kókshetaýlyq óz kinásin moiyndap, búiregin satý týraly habarlandyrýdy materialdyq qiyndyqtarǵa jáne aliment boiynsha beresheginiń bolýyna bailanysty jariialaǵanyn túsindirdi.
Jaza taǵaiyndaýda sot turǵynnyń jasaǵan isine shyn júrekten ókinýin, alimenttik mindettemeler boiynsha beresheginiń bolýyna bailanysty aýyr materialdyq jaǵdaiyn, sondai-aq jasalǵan qylmystyń ziiandy saldarynyń bolmaýyn jeńildetetin mán-jailar dep eskerdi.
Sot úkimimen kókshetaýlyq turǵynǵa 2 jyl shartty túrde bas bostandyǵynan aiyrý jazasy taǵaiyndalyp, probatsiialyq baqylaý belgilendi.
Úkim zańdy kúshine engen joq.
