Aqmola oblysynyń Tselinograd aýdanynda ótken jekemenshik kókpar oiyny qaiǵyly jaǵdaimen aiaqtaldy. Oiyn barysynda 14 jastaǵy jasóspirim qaza tapty, dep habarlaidy dalanews.kz.
"Nayza_kokshe" instagram paraqshasy usynǵan derekke sáikes, marqum – Qabanbai batyr aýylynyń turǵyny, segizinshi synyp oqýshysy. Aldyn ala málimet boiynsha, ol attan qulap, esinen tanyp qalǵan. Dárigerlerdiń kómegine qaramastan, jasóspirimdi aman alyp qalý múmkin bolmaǵan.
Oqiǵadan keiin kókpardy kim uiymdastyrǵany, jarystyń resmi túrde ótkizilgen-ótkizilmegeni jáne jasóspirimniń oiynǵa qalai qatysqany qoǵamda qyzý talqylana bastady.
Oblystyq dene shynyqtyrý jáne sport basqarmasy bul jarysqa qatysy joq ekenin málimdedi. Al aýdan ákimdigi kókpardyń ótkiziletininen beihabar bolǵanyn habarlady.
Keiin belgili bolǵandai, bul resmi jarys emes, azamattardyń jeke bastamasymen uiymdastyrylǵan eresekterdiń jattyǵý oiyny bolǵan.
Tselinograd aýdandyq ákimdiginiń málimetinshe, 26 mamyr kúni Raqymjan Qoshqarbaev aýyldyq okrýginiń aýmaǵynda ótken jiyn týraly jergilikti bilikke aldyn ala habar berilmegen. Uiymdastyrýshylar tarapynan eshqandai kelisim alý nemese habarlama joldanbaǵan.
Ákimdiktiń aldyn ala derekterine sáikes, oiynǵa negizinen eresek adamdar qatysqan. Al qaza tapqan Súienish Dinmuhammet Dastanuly oiyn ótetin jerge týystarymen birge kelgen. Keiin ol kelmei qalǵan oiynshylardyń biriniń ornyna kókparǵa qosylǵan.
Sondai-aq aýdan ákimdigi bul eldi mekende memlekettik mekemelerdiń qaraýyndaǵy kókpar sektsiialary joq ekenin málimdedi.
Oiyn M.S. Nárikbaev atyndaǵy KAZGUU ýniversitetine tiesili, demalys aimaǵy retinde rásimdelgen jer teliminde ótken. Nysannyń resmi ataýy joq.
Qazir qaiǵyly oqiǵanyń barlyq mán-jaiyn quqyq qorǵaý organdary anyqtap jatyr.
