Birer kún buryn Jambyl aýdanyndaǵy Asa ózeninde sý mólsheriniń kóbeiýinen «Dorojnik» saiajaiyna alyp baratyn jol boiyn sý basty. Alaida turǵyndar men úilerge eshqandai qaýip tóngen joq. Saiajai baǵytyndaǵy avtokólikter qozǵalysy «Qarataý» bólimshesi arqyly ótetin jol boiymen, al jaiaý júrginshiler qatynasy Asa sý júiesi arqyly júzege asyrylýda. Sý deńgeiin baqylaý-qadaǵalaý maqsatynda jergilikti atqarýshy organdar qyzmetkerleriniń táýlik boiǵy kezekshiligi uiymdastyrylǵan.
«Batys Eýropa-Batys Qytai» avtojolynyń 515-shi shaqyrymynda jergilikti atqarýshy organdar kúshimen uzyndyǵy 1100 metrlik bógetti bekemdep, nyǵaitý jumystary júrgizilýde. Jaǵalaý boiynyń jaǵdaiy men sý deńgeii jiti baqylaýda.
Aita ketý kerek, ústimizdegi jyldyń 28 naýryzynda oblys ákimi shuǵyl shtab májilisin ótkizip, onda Taraz qalasy men aýdandar ákimderine, óńirdiń memlekettik organdary men apattyq-qutqarý qyzmetterine tiisinshe tapsyrmalar bergen bolatyn.
