Óńir basshysy Asa, Talas, Shý ózenderi men Aqkól kóliniń jaǵalaýlaryn áýeden baqylap, kórip shyqty. Kárim Kókirekbaev, sondaı-aq, Talas aýdanyndaǵy Berikqara aýyldyq okrýgine qarasty Turlybaı eldi mekeni men Aqkól-Úsharal dańǵyly boıyndaǵy Asa ózeni ústine salynǵan kópirdiń jaǵdaıymen de tanysty. Buǵan qosa, Shý jáne Qordaı aýdandaryndaǵy «Radaı» sý retteý qurylǵysy men «Tasótkel», «Aqsý», «Qaqpatas» sý qoımalarynda tekserý júzege asyrylatyn bolady.
Birer kún buryn Jambyl aýdanyndaǵy Asa ózeninde sý mólsheriniń kóbeıýinen «Dorojnık» saıajaıyna alyp baratyn jol boıyn sý basty. Alaıda turǵyndar men úılerge eshqandaı qaýip tóngen joq. Saıajaı baǵytyndaǵy avtokólikter qozǵalysy «Qarataý» bólimshesi arqyly ótetin jol boıymen, al jaıaý júrginshiler qatynasy Asa sý júıesi arqyly júzege asyrylýda. Sý deńgeıin baqylaý-qadaǵalaý maqsatynda jergilikti atqarýshy organdar qyzmetkerleriniń táýlik boıǵy kezekshiligi uıymdastyrylǵan.
«Batys Eýropa-Batys Qytaı» avtojolynyń 515-shi shaqyrymynda jergilikti atqarýshy organdar kúshimen uzyndyǵy 1100 metrlik bógetti bekemdep, nyǵaıtý jumystary júrgizilýde. Jaǵalaý boıynyń jaǵdaıy men sý deńgeıi jiti baqylaýda.
Aıta ketý kerek, ústimizdegi jyldyń 28 naýryzynda oblys ákimi shuǵyl shtab májilisin ótkizip, onda Taraz qalasy men aýdandar ákimderine, óńirdiń memlekettik organdary men apattyq-qutqarý qyzmetterine tıisinshe tapsyrmalar bergen bolatyn.
