Qazaqstanda oqyrman mádenietin damytýǵa baǵyttalǵan «Kitap oqyp, tulǵa bolam» jobasy eki jyldyq úzilisten keiin qaita qolǵa alyndy. Jobany uiymdastyrýshylardyń aitýynsha, bastama 2021 jyldan beri júzege asyrylyp keledi jáne osy ýaqyt ishinde myńdaǵan qazaqstandyqty kitap oqýǵa yntalandyrǵan, dep habarlaidy dalanews.kz.
Jobanyń tanystyrylymyna kásipker, metsenat, SAN tyres kompaniiasynyń basshysy Syrymbek Taý, Qazaqstan Respýblikasy Mádeniet jáne aqparat ministrligi Arhiv, qujattama jáne kitap isi komiteti tóraǵasynyń orynbasary Quspan Rollan Qabyluly qatysty.
Joba uiymdastyrýshysy Baqdáýlet Dosmuhammedulynyń málimetinshe, 2022 jyly is-shara aiasynda 126 myń adam kitap oqyp, qorytyndy kezeńde jeńimpaz Astana qalasynan bir bólmeli páter ielengen. Keiin túrli sebepke bailanysty joba eki jylǵa toqtap qalǵan. Biyl bastama qaita jandanyp, jańa formatta jalǵasty.
Joba úsh aiǵa josparlanǵan. Ár aida qatysýshylar bir kitaptan oqidy. Barlyq kitap elektrondy formatta tegin usynylady. Ár kezeń aiaqtalǵan soń qatysýshylar 100 suraqtan turatyn onlain test tapsyrady. Test aidyń sońǵy kúni saǵat 20:00-de bastalyp, 16 minýt ishinde oryndalady. 40 upaidan joǵary nátije kórsetken qatysýshylar júldeler utyp alýǵa múmkindik alady.
Jobaǵa qatysý tegin.
Alǵashqy kezeń naýryz aiynda ótti. Qatysýshylar “Dala danyshpany – Maiqy bi” kitabyn oqydy. Bul kezeńge 52 713 adam tirkelgen. Onyń ishinde shamamen 46 myń adam kitapty onlain túrde júktep alyp oqyǵan. Test nátijesinde 17 myń adam 40 upaidan joǵary kórsetkishke qol jetkizdi.
Sáýir aiynda ótken ekinshi kezeńde qatysýshylar Tahaýi Ahtanovtyń “Túnde atylǵan oq” shyǵarmasyn oqydy. Kitapty 26 myń adam júktep alǵan. Test qorytyndysy boiynsha 19 qatysýshy 100 upai jinasa, 467 adam 90 upaidan joǵary nátije kórsetken. Al 3450 adam 40 pen 90 upai aralyǵynda ball jinaǵan.
Úshinshi kezeń mamyr aiynda uiymdastyrylyp, oqyrmandar Oralhan Bókeidiń “Ataý kere” shyǵarmasyn oqydy. Bul kezeńde 4071 adam test tapsyrǵan. Onyń ishinde 1723 qatysýshy 40 upaidan joǵary nátije kórsetse, 663 adam 80 upaidan asqan. Sondai-aq 1016 adam testti belgilengen ýaqyt ishinde aiaqtaǵan.
Joba aiasynda uiymdastyrý alqasy jalpy kólemi 35 million teńge bolatyn júlde qoryn bólgen. Qatysýshylarǵa 10 myń teńgeden bastap 5 million teńgege deiingi aqshalai syilyqtar tabystaldy. Jalpy sany 100-den astam jeńimpaz marapattaldy.
Final qorytyndysy boiynsha birinshi oryndy Qanatqyzy Asiia ielenip, 2 million teńge utyp aldy. Ekinshi oryn alǵan Kenjetaev Nursultanǵa 1 million teńge berilse, úshinshi oryn iegeri Rinatuly Sultanáli 500 myń teńgege ie boldy.
Tórtinshi oryn alǵan Amangeldi Shuǵylaǵa 300 myń teńge, besinshi oryn iegeri Hametova Aigerimge 200 myń teńge tabystaldy.
Altynshy orynnan onynshy orynǵa deiingi qatysýshylar — Sabdenbek Maqsat, Gýbaidýllina Jibek, Abilhan Erbolat, Berdeshev Azat jáne Rinat Ahmat 100 myń teńgeden syiaqy aldy.
Sonymen qatar arnaiy kezdeisoq tańdaý (random) nátijesi boiynsha da jeńimpazdar anyqtaldy. Bas júlde — 5 million teńge Qaskeleń qalasynyń turǵyny Bolatqyzy Nurzadaǵa buiyrdy. Jetisý oblysynyń turǵyny Qalamqas Nurǵazyqyzy 2,5 million teńge ielense, astanalyq Dosymjanov Aidos 1 million teńge utyp aldy.
Sondai-aq Quralai Sársenbaeva, Jazira Ońǵarbaeva, Qyzyrbek Qarlyǵash, Uzaqova Aigerim Qairatovna, Málik Maýlythan, Qanatqyzy Asiia jáne Shynybaev Didar 100 myń teńgelik aqshalai júldelerge ie boldy.
Uiymdastyrýshylardyń aitýynsha, jobanyń basty maqsaty – elimizdegi kitap oqityn azamattardyń sanyn arttyryp, qatysýshylar qataryn 1 million oqyrmanǵa jetkizý.
