Senator Andrei Lýkin Uly Jeńistiń 80 jyldyǵyna arnalǵan áskeri sherýge bólingen 2,5 mlrd teńge kólemindegi qarjy oryndy dep málimdedi, dep habarlaidy Dalanews.kz.
"Bul – tolyq negizdelgen shyǵyn. Bul – saiasi másele, ony qoǵam tek oń kózqaraspen qabyldaidy. Barlyq qazaqstandyq Uly Otan soǵysyndaǵy Jeńistiń mereitoiyn atap ótýge daiyndalyp jatyr", – dedi Lýkin Senattyń kýlýarynda.
Senatordyń aitýynsha, áskeri sherýge tek qazaqstandyqtardyń ǵana emes, búkil álemdik qaýymdastyqtyń nazary aýady. Sondyqtan "kez kelgen shyǵyn oryndy" dep esepteidi.
Aita keteiik, Uly Otan soǵysynyń 80 jyldyǵyna orai Astanada aýqymdy áskeri sherý uiymdastyrylady. Bul sharaǵa biýdjetten 2,5 milliard teńge bólinbek.
Qorǵanys ministrligi Tárbie jáne ideologiialyq jumystar departamentiniń ókili, polkovnik Vitalii Adamovichtiń aitýynsha, bólingen qarajat janar-jaǵarmai, qosalqy bólshekter, áskerlerdiń qozǵalysy, issapar shyǵyndary men áskeri forma tigýge jumsalady.
Áskeri sherý úsh kezeńnen turady:
1. Jaiaý sherýdiń tarihi jáne zamanaýi bólimderi – áskeri ekipajdar sap túzep ótedi.
2. Mehanikalandyrylǵan tehnika sherýi – brondy tehnikalar kórsetiledi.
3. Áskeri aviatsiianyń ushýy – ushaqtar men tikushaqtar aspanda sap túzeidi.
Biylǵy sherýdiń basty ereksheligi – Qazaqstan aýmaǵynda jasaqtalǵan 23 diviziia men brigadanyń jaýyngerlik týlarynyń saltanatty túrde alańnan alyp ótilýi. Sondai-aq, Áskeri tarih murajaiynda saqtalǵan T-34 tankimen Jeńis týynyń kóshirmesi sherýge qatysady.
Oǵan qosa, sońǵy jyldary satyp alynǵan zamanaýi qarý-jaraq pen áskeri tehnikanyń jańa úlgileri kópshilikke tanystyrylmaq.
