Tanymal prodiýser jýyrda telejúrgizýshi Dinara Sátjanǵa bergen suhbatynda "kúieýimmen bolǵan oqiǵadan keiin quqyq qorǵaý uiymdarynyń birde-biri maǵan habarlasqan joq" dep málimdegen bolatyn.
Birlestik tóraiymy Galina Morozovanyń aitýynsha, Baiannyń ózi eshqashan eshqandai uiymmen bailanyspaǵan.
"Baianǵa eshkim qol ushyn sozbady degenge senbeimin. Óitkeni, Qazaqstanda daǵdarys ortalyqtary, senim telefondary, jedel jeliler jetip artylady. Eger ol buǵan deiin sol ortalyqtarǵa habarlasyp, kúieýinen jii zábir kóretinin aitsa mindetti túrde oǵan aqyl-keńes beriletin edi. Naqty kimnen kómek surapty? Nege aitpaidy? Ol qansha jyldan beri jábirlengen, zorlanǵan, kúieýinen zábir kórgen áielderdi kórse de olarǵa kóz juma qarap keldi, óziniń basyna túspeiinshe olardyń azabyn sezingen joq", - deidi Galina Morozova.
Atalǵan suhbatynda Baian Esentaeva "maǵan birde-bir quqyq qorǵaý uiymy kómektesken joq, sondyqtan mundai uiymdy ózim quryp alamyn" degen bolatyn. Osylaisha ol turmystyq janjaldan zábir kórgen áielderdi qorǵaitynyn málimdedi.
Esterińizge salaiyq, Baian Esentaevany kúieýi Baqytbek Esentaev 10 maýsym kúni Almatydaǵy áýejaidan qaitar jolda ólimshi etip sabap, pyshaqtap tastaǵan bolatyn. Aýyr halde aýrýhanaǵa jetkizilgen prodiýser tek birneshe operatsiia jasalǵannan keiin ǵana ózine keldi. Jýyrda ol sol oqiǵa kezinde kúieýiniń zorlaǵanyn da aitqan bolatyn. Qazir Almatyda Baqytbek Esentaevtyń sot protsesi bastalyp ketti. Oǵan kisi óltirýge oqtaldy degen aiyp taǵylýda.
