Kentaýda ken óńdeitin zaýyt ashylyp, jylyjai isi qarqyndy damýda
Kentaýdaǵy barit ónimderin óńdeitin zaýyt qaita is qosyldy. 10 jyldai ýaqyt turalap qalǵan kásiporynǵa búginde 600 mln. teńge investitsiia quiylǵan. Náijesinde 100-den astam jergilikti turǵyn «Vostok-Mineral» JShS-ne jumysqa ornalasqan. Ońtústik Qazaqstan oblysy ákiminiń baspasóz qyzmeti uiymdastyrǵan press-týr kezinde jýrnalister osy syndy birqatar shaǵyn jáne orta kásipkerlik nysandaryn aralap, jumysymen tanysty.
Kásiporyn jylyna 50 myń tonna barit ónimderin óńdeýge qaýharly. 2018-2025 jyldary zaýyttyń ónim kólemi 1 mlrd. 730 mln. teńge artyp, 344 mln. teńge salyq túsiredi degen jospar bar. Daiyn ónim elimizdiń munai-gaz salasyndaǵy ulttyq kompaniialardan bólek, Resei jáne Ózbekstanǵa eksporttalatyn bolady.
Sondai-aq, BAQ ókilderi aýyl sharýashylyq jáne áleýmettik salasyna qatysty kásipkerlik nysandarynda da boldy. Qalaǵa qarasty Qarnaq aýylynyń turǵyny A.Habibýllaev 2014 jyly mal bordaqylaý alańyn ashqan. Iri qara ósirýmen ainalysatyn sharýa, búginde sút óndirýdi de jolǵa qoiǵan. Qazirgi tańda 10 siyr saýyp, 10 ógiz bordaqylap otyr. 2 adam jumyspen qamtylǵan.
Osy aýyldyń turǵyny O.Iýldasheva januiasymen jylyjai sharýashylyǵyn qolǵa alǵan. 20 sottyq aýmaqqa qyzanaq pen qiiar ósirýmen ainalysady. Qojalyq iesi kásibin bastapqy da 3 mln. teńge nesie alyp bastaǵan. Búginde sharýa 15 tonnaǵa deiin ónim alyp, Kentaý, Túrkistan qalalaryna saýdalaýda.
Sonymen qatar, Kentaý qalasynda «Órleý» jáne «Ataýly áleýmettik kómek» baǵdarlamalarynyń arqasynda jeke kásip ashyp, óz isin dóńgeletip otyrǵandar da barshylyq. Solardyń biri 3 balanyń anasy S.Moldabaeva Órleý jobasy arqyly 766500 teńge alyp, jeke tigin sheberhanasyn ashqan. Bir adamdy jumysqa qabyldaǵan kásipker kórpe-tósek bastap, kiim keshekke deiin tigýdi qolǵa alǵan.
Aita keteiik, 2017 jyly Órleý jobasy boiynsha 790 otbasy 288,2 mln. teńgege aqshalai kómek alǵan. Olardyń qatarynda mal jáne qus sharýashylyǵynan bólek, tigin, aǵash, temir sheberhanasy men túrli qyzmetter kórsetetin shaǵyn mekemeler bar. Sondai-aq, «Ataýly áleýmettik kómek» boiynsha jyl basynan beri 860 otbasyǵa 112000 mln. teńge qarjylai kómek taǵaiyndalǵan.
