Keles aýdanynyń ákimi taǵaiyndaldy
Jańa ákimdi jańadan qurylǵan aýdan aktivine arnaiy tanystyrǵan aimaq basshysy onyń aldaǵy jumysyna sáttilik tilei otyryp, qyzmet barysynda Memleket basshysy bekitken baǵdarlamalardy sapaly júzege asyrý qajettigin aitty.
– Mine, 21 jyldan keiin Keles aýdany qurylyp otyr. Bul – qýanyshty jaǵdai. Endi aýdanda jańa bólimder, halyqqa qyzmet kórsetý ortalyqtary men túrli mekemeler ashylady. Áleýmettik nysandar salynady. Jumys oryndary kóbeiedi. Jańa aýdannyń ákimine júkteler mindet kóp. Aýyl sharýashylyǵyn damytyp, kásipkerlikti órkendetýge kúsh salý kerek. Aldaǵy bir ai ishinde Keles aýdanynyń damý tujyrymdamasyn ázirleýdi tapsyramyn. Bilim, bala tárbiesi máselelerine de basa mán berilsin. Eń bastysy, el birligin saqtap, Elbasy saiasatyn júzege asyryp, eldiń ál-aýqatyn kóterýge aianbai jumys isteýińiz qajet. Al, ol úshin osyndaǵy el aǵalary, aqsaqaldar ákimge qoldaý kórsetip, yntymaqty joǵary orynǵa qoiǵany abzal. Keles – shekara mańynda ornalasqan strategiialyq mańyzy bar aýdan. Sondyqtan, aýdandy kóterýge bárimiz úles qosaiyq. Ózderińiz biletindei, Túrkistan oblysy quryldy. Osyndai tarihi sátte Keles aýdanynyń enshi alýy da aitýly oqiǵa dep bilemin. Memleketimiz qýatty bolý úshin ár aýyl, ár aýdan, ár oblysta jumystar atqarylyp, birlikpen alǵa qadam basýymyz kerek, – dedi J.Túimebaev.
Aita keteiik, Aqmentai Úsenuly Esbaev 1972 jyly týylǵan, bilimi joǵary, mamandyǵy boiynsha biliktiligi ekonomist.
Eńbek jolyn 1989 jyly Ońtústik Qazaqstan oblysy Saryaǵash aýdany V.Lenin atyndaǵy mektepte óndiristik brigadanyń jumysshysy bolyp bastaǵan.
1989-2014 jyldary Ońtústik Qazaqstan oblysy Saryaǵash aýdany Ǵ.Muratbaev sovhozynyń kásipodaq komitetinde esepshi, aýdandyq qarjy bóliminiń jergilikti biýdjet bóliminiń basshysy, aýdannyń ekonomika jáne biýdjettik josparlaý bóliminiń biýdjettik josparlaý sektorynyń meńgerýshisi, aýdannyń ekonomika jáne qarjy bóliminiń biýdjettik jáne monitoring sektorynyń meńgerýshisi, aýdannyń ekonomika jáne qarjy bóliminiń basshysy laýazymdaryn atqarǵan.
2014 jyldyń tamyz aiynan bastap Ońtústik Qazaqstan oblysy Saryaǵash aýdany ákiminiń orynbasary bolyp qyzmet etip keldi.
Túrkistan oblysy ákiminiń baspasóz qyzmeti
