بۇگىن تۇركىستان وبلىسىنىڭ كەلەس اۋدانىنا جاڭا اكىم تاعايىندالدى. ق ر پرەزيدەنتى اكىمشىلىگىنىڭ جانە اۋداندىق ءماسليحاتتىڭ كەلىسىمى بويىنشا وبلىس اكىمى جانسەيىت تۇيمەبايەۆتىڭ وكىمىمەن، سونىمەن بىرگە، مەريتوكراتيا قاعيداتى بويىنشا بۇل قىزمەتكە اقمەنتاي ەسبايەۆ كىرىستى.

جاڭا اكىمدى جاڭادان قۇرىلعان اۋدان اكتيۆىنە ارنايى تانىستىرعان ايماق باسشىسى ونىڭ الداعى جۇمىسىنا ساتتىلىك تىلەي وتىرىپ، قىزمەت بارىسىندا مەملەكەت باسشىسى بەكىتكەن باعدارلامالاردى ساپالى جۇزەگە اسىرۋ قاجەتتىگىن ايتتى.

– مىنە، 21 جىلدان كەيىن كەلەس اۋدانى قۇرىلىپ وتىر. بۇل – قۋانىشتى جاعداي. ەندى اۋداندا جاڭا بولىمدەر، حالىققا قىزمەت كورسەتۋ ورتالىقتارى مەن ءتۇرلى مەكەمەلەر اشىلادى. الەۋمەتتىك نىساندار سالىنادى. جۇمىس ورىندارى كوبەيەدى. جاڭا اۋداننىڭ اكىمىنە جۇكتەلەر مىندەت كوپ. اۋىل شارۋاشىلىعىن دامىتىپ، كاسىپكەرلىكتى وركەندەتۋگە كۇش سالۋ كەرەك. الداعى ءبىر اي ىشىندە كەلەس اۋدانىنىڭ دامۋ تۇجىرىمداماسىن ازىرلەۋدى تاپسىرامىن. ءبىلىم، بالا تاربيەسى ماسەلەلەرىنە دە باسا ءمان بەرىلسىن. ەڭ باستىسى، ەل بىرلىگىن ساقتاپ، ەلباسى ساياساتىن جۇزەگە اسىرىپ، ەلدىڭ ءال-اۋقاتىن كوتەرۋگە ايانباي جۇمىس ىستەۋىڭىز قاجەت. ال، ول ءۇشىن وسىنداعى ەل اعالارى، اقساقالدار اكىمگە قولداۋ كورسەتىپ، ىنتىماقتى جوعارى ورىنعا قويعانى ابزال. كەلەس – شەكارا ماڭىندا ورنالاسقان ستراتەگيالىق ماڭىزى بار اۋدان. سوندىقتان، اۋداندى كوتەرۋگە ءبارىمىز ۇلەس قوسايىق. وزدەرىڭىز بىلەتىندەي، تۇركىستان وبلىسى قۇرىلدى. وسىنداي تاريحي ساتتە كەلەس اۋدانىنىڭ ەنشى الۋى دا ايتۋلى وقيعا دەپ بىلەمىن. مەملەكەتىمىز قۋاتتى بولۋ ءۇشىن ءار اۋىل، ءار اۋدان، ءار وبلىستا جۇمىستار اتقارىلىپ، بىرلىكپەن العا قادام باسۋىمىز كەرەك، – دەدى ج.تۇيمەبايەۆ.

ايتا كەتەيىك، اقمەنتاي ۇسەن ۇلى ەسبايەۆ 1972 جىلى تۋىلعان، ءبىلىمى جوعارى، ماماندىعى بويىنشا بىلىكتىلىگى ەكونوميست.

ەڭبەك جولىن 1989 جىلى وڭتۇستىك قازاقستان وبلىسى سارىاعاش اۋدانى ۆ.لەنين اتىنداعى مەكتەپتە وندىرىستىك بريگادانىڭ جۇمىسشىسى بولىپ باستاعان.

1989-2014 جىلدارى وڭتۇستىك قازاقستان وبلىسى سارىاعاش اۋدانى ع.مۇراتبايەۆ سوۆحوزىنىڭ كاسىپوداق كوميتەتىندە ەسەپشى، اۋداندىق قارجى ءبولىمىنىڭ جەرگىلىكتى بيۋدجەت ءبولىمىنىڭ باسشىسى، اۋداننىڭ ەكونوميكا جانە بيۋدجەتتىك جوسپارلاۋ ءبولىمىنىڭ بيۋدجەتتىك جوسپارلاۋ سەكتورىنىڭ مەڭگەرۋشىسى، اۋداننىڭ ەكونوميكا جانە قارجى ءبولىمىنىڭ بيۋدجەتتىك جانە مونيتورينگ سەكتورىنىڭ مەڭگەرۋشىسى، اۋداننىڭ ەكونوميكا جانە قارجى ءبولىمىنىڭ باسشىسى لاۋازىمدارىن اتقارعان.

2014 جىلدىڭ تامىز ايىنان باستاپ وڭتۇستىك قازاقستان وبلىسى سارىاعاش اۋدانى اكىمىنىڭ ورىنباسارى بولىپ قىزمەت ەتىپ كەلدى.

تۇركىستان وبلىسى اكىمىنىڭ باسپا ءسوز قىزمەتى