Qoja Ahmet Iassaýi kesenesi aýmaǵyndaǵy tarihi oryndardy qalpyna keltirý jumystary 2019 jyly bastalmaq.
Qazaqstan Respýblikasy Premer-Ministriniń birinshi orynbasary A.Mamin, QR Mádeniet jáne sport ministri Arystanbek Muhamediuly Túrkistan qalasyn damytýǵa arnalǵan issapar barysynda «Áziret Sultan» memlekettik tarihi-mádeni qoryq-mýzeiine qarasty «Han meshiti», «Han ordasy» jáne Kúltóbe qalashyǵy men «Jeti ata», «Darbaza», «Músálla», «Tákiia» qaqpalaryn aralady.
«Uly dalanyń jeti qyry» baǵdarlamalyq maqalasy men qalany túrki dúniesiniń rýhani astanasy retinde tanytý jáne tarihi oryndardyń tól kelbetin saqtai otyryp, jandandyrý maqsatynda Mádeniet jáne sport ministrligi Túrkistan qalasyndaǵy 88,7 gektar aýmaqta ornalasqan ortaǵasyrdaǵy tarihi-mádeni mura obektileriniń tarihi kelbetin anyqtaýǵa jáne qalpyna keltirýge arnalǵan jobany daiyndap shyqqan bolatyn.
Jobany ázirleýge qoiylatyn barlyq halyqaralyq normalar men talaptardy saqtaý maqsatynda jetekshi ǵalymdar men halyqaralyq sarapshylar tartylyp, alǵashqy derekter, ǵylymi jáne muraǵat málimetteri zerttelse, barlyq usynylǵan rekonstrýktsiialar jáne arheologiialyq jumystar IýNESKO ókilderimen kelisý arqyly júzege aspaq. Bul jóninde QR Mádeniet jáne sport ministri Arystanbek Muhamediuly málimdedi.
- «Bul jumystarǵa biz belgili halyqaralyq sarapshylardy qatystyrdyq jáne «Áziret Sultan» qoryq-mýzeiiniń tujyrymdamasyna sáikes keletin Izrail, Ispaniia, Ulybritaniia, Úndistan, Túrkiia, Ózbekstan jáne taǵy basqa memleketterdiń álemge áigili tarihi keshenderi men mýzeilerin saqtaý jáne restavratsiialaý tájiribesin muqiiat zerttedik.
Jobada ejelgi Rim qalasyndaǵy Pompei, Ierýsalim qalasy, Osman imperiiasynyń iri saraiy "Topqapy", Mevlana mýzeii tárizdi, sondai-aq IýNESKO obektileri bolyp tabylatyn jáne jyl saiyn júzdegen million týristerdi qabyldaityn tarihi keshenderdi rekonstrýktsiialaýdyń jáne qalpyna keltirýdiń úzdik halyqaralyq tájiribeleri eskerildi»,-dedi ministr.
