Premer-mınıstrdiń birinshi orynbasary Roman Sklár 2026 jyldan bastap jańa Salyq kodeksi kúshine engen kezde baspana baǵasy qalaı ózgeretini týraly suraqqa jaýap berdi, dep habarlaıdy Dalanews.kz.
Úkimettegi baspasóz konferensıasynda jýrnalıser vıse-premerden jańa Salyq kodeksiniń turǵyn úı naryǵyna áseri týraly surady. 2026 jyldan bastap qurylys kompanıalary 16 paıyz mólsherinde qosylǵan qun salyǵyn (QQS) tóleýge mindetteledi.
"Qoǵamda bul ózgeris baspana baǵasy kem degende 20 paıyzǵa ósýine ákep soǵady degen alańdaýshylyq bar. Endi qarapaıym qazaqstandyqtar ne istemek?" – dep surady jýrnalıser.
Ol jańa Salyq kodeksi turǵyn úı satyp alý kezinde qarapaıym azamattarǵa áser etpeıtinine sendirdi. Bıyl 19 mln sharshy metrden astam qurylys salynady.
"Bizde turǵyn úı quny naryqtyq ádistermen retteledi. Alaıda, jeke qurylysshylardan turǵyn úı satyp alatyn tapsyrys berýshi retinde memlekettiń aralasýy 10 jyl ishinde óziniń tıisti áserin berip keledi. Bizde turǵyn úı baǵasy qatty qymbat emes. Men "bıznes" nemese "elıta" klass segmentin emes, ekonom klastaǵy turǵyn úıdi aıtyp otyrmyn. Onyń baǵasy ózine laıyq, Biz munda baǵanyń kúrt ózgeristerge ushyrap jatqanyn kórip otyrǵan joqpyz. Jańa Salyq kodeksiniń qabyldanýyna baılapysty iri qurylys kompanıalary bıznesti bólshektep, úlken paıda tabatyn tájirıbe joıylatyn bolady", - dedi Roman Sklár.
Vıse-premer turǵyn úı quny jobalaý-smetalyq qujattamaǵa jáne az qamtylǵan azamattar úshin beriletin memlekettik tapsyrysqa sáıkes, onyń ishinde "Baqytty otbasy" baǵdarlamasy nemese jumys isteıtin jastarǵa arnalǵan "Naýryz Jumysker" baǵdarlamasy sheńberinde retteletinin aıtty.
