Elordada Kazakhstan Travel Forum 2026 halyqaralyq týristik forýmy bastaldy. Biylǵy forýmnyń negizgi taqyryby – «Qaýipsiz týrizm». Is-sharaǵa Týrizm jáne sport vitse-ministri Miras Tólebaev, Kólik vitse-ministri Talǵat Lastaev, «Týristik Qamqor» korporativtik qorynyń tóraǵasy Inna Rei, Qazaqstan Respýblikasy Quryltaiynyń depýtaty Ekaterina Smoliakova, Vladimir Sytnik. SCAT áýe kompaniiasynyń vitse-prezidenti, óńirlik týrizm basqarmalarynyń basshylary, týristik qaýymdastyq ókilderi jáne sala mamandary qatysty, dep habarlaidy dalanews.kz.
Forýmnyń ashylýynda Miras Tólebaev qazirgi tańda týrizmniń jekelegen jobalar men baǵyttar sheńberinen shyǵyp, infraqurylym, investitsiia, kólik qoljetimdiligi, qyzmet kórsetý sapasy, kadr daiarlaý jáne tsifrlandyrýdy qamtityn keshendi salaǵa ainalǵanyn atap ótti. Onyń aitýynsha, keiingi jyldary Qazaqstanda týrizmniń negizgi kórsetkishteri turaqty ósip keledi.
«Kazakhstan Travel Forum úsh jyl ishinde pikirtalas alańynan memleket, biznes, óńirler men týristik qaýymdastyqtyń basyn qosatyn halyqaralyq kásibi forýmǵa deiingi joldan ótti. Ótken jyldardaǵy forýmdarǵa qatysqan áriptester bul joly is-sharanyń aýqymy keńeiip, kirme jáne ishki týrizmdi qamtyǵanyn baiqaǵan bolar. Menińshe, bul Qazaqstan týrizminde bolyp jatqan ózgeristerdi de aiqyn kórsetedi», – dedi vitse-ministr.
Biyl Qazaqstan azamattarynyń shyǵý týrizmi salasyndaǵy quqyqtaryna kepildik berý júiesiniń jumys istep kele jatqanyna 10 jyl tolyp otyr. Osy ýaqyt ishinde júie týristerdiń qaýipsizdigin qamtamasyz etýdiń naqty ári tiimdi tetigine ainaldy. «Týristik Qamqor» korporativtik qorynyń resmi málimetine sáikes, júie jumys istegen kezeńde 15 212 týristiń elge qaitarylýy qamtamasyz etildi. Júieniń negizgi quraldarynyń biri – týrkod. Ol týroperator óz mindettemelerin oryndai almaǵan jaǵdaida týristiń kepildik berý júiesi aiasynda kómek alýyna jáne Qazaqstanǵa qaitarylýyna negiz bolady.
«Týrkod – shyǵys týrizminiń barlyq protsesterin bailanystyratyn bizdiń altyn kiltimiz. Onyń artynda zańdy týroperator, rastalǵan marshrýt, saiahatshy týraly málimetter jáne naqty qorǵaý mehanizmi tur», – dedi «Týristik Qamqor» korporativtik qorynyń tóraǵasy Inna Rei.
Is-shara barysynda Qazaqstan týrizminiń keiingi jyldardaǵy damý kórsetkishteri tanystyryldy. 2019-2025 jyldar aralyǵynda ishki týrister sany 6,6 mln-nan 11 mln adamǵa, al kelýshiler sany 8,5 mln-nan 15,8 mln adamǵa ósti. Sonymen qatar týrizm salasyna tartylǵan investitsiia kólemi de edáýir artqan.
Elimizde týristik infraqurylymdy damytýǵa da erekshe kóńil bólinip keledi. Qazirgi tańda elimizdiń 10 negizgi óńirinde jeke týrizm basqarmalary jumys isteidi. 11 óńirde týristik aqparattyq ortalyqtar, al respýblika boiynsha 23 vizit-ortalyq qyzmet kórsetedi. Sońǵy bir jylda kýrorttyq aýmaqtarda shamamen 10 jaǵajai aimaǵy abattandyryldy.
Kazakhstan Travel Forum 2026 17-19 qyrkúiek kúnderi ótedi. Forým baǵdarlamasyna paneldik pikirtalastar, saraptamalyq sessiialar, B2B kezdesýler, týristik ónimderdiń tanystyrylymdary jáne kelisimderge qol qoiý rásimderi engizilgen. Biyl forým aiasynda kepildik berý júiesiniń 10 jyldyǵyna jáne týristerdiń quqyqtaryn qorǵaý, biznestiń jaýapkershiligi, qarjylyq kepildikter men tsifrlyq sheshimderdi damytý máselelerine erekshe nazar aýdarylyp otyr.
