Kásiptiń kózin tapqan Karina
Rasyn aitý kerek, óńir turǵyndary sańyraýqulaqty kóktem mezgilinde taýly jáne qumdy aimaqtardan terip alyp paidaǵa jaratatynyn kórip te, bilip te júrmiz. Alaida, arnaiy jylyjai salyp, óz qolymen baqshasynda sańyraýqulaq ósirip, ony jyl on eki ai naryqqa shyǵaratyn aýdandaǵy kásipkerdi biz buǵan deiin estimegenbiz. Bilgenimizdei, Karina Nurǵazyqyzy nebári 25 jasta eken. Joǵary oqý ornyn támamdaǵan soń, Astana qalasynda túrli mekemelerde jumys istegen kórinedi. Deiturǵanmen, alyp qaladaǵy mardymsyz jalaqyǵa kóńili tolmaǵandyqtan, týǵan ólkesine kelip, óz kásibin ashýdy qup kórgen.
– Bul kásipti qolǵa alǵanyma kóp ýaqyt bola qoimady. Áýelgide, jylyjai qurylysy men sańyrýqulaq túpterin Almaty qalasynan jetkizýge eki jumadai ýaqyt ketti. «Veshenka» dep atalatyn sańyraýqulaqtyń bul surpy qolda ósirýge arnalǵan. Qazirgi kezde elimizdiń túkpir-túkpirinde osy surypty ósirýdi qolǵa alǵan kásipkerlerdiń qatary artyp keledi. Mine, biz de táýekelge bel býyp, sańyraýqulaqtan mol ónim alyp otyrmyz. Bul jylyjai 1000 túp sańyraýqulaq ósirýge shaqtalǵan. Alaida, atalmysh kásippen alǵash ret ainalysyp otyrǵandyqtan, 500 túpti ósirip kóreiin dep sheshtim. Ázirge nátijesi jaman emes. Kúnine 20-30 keli sańyraýqulaq alyp otyrmyz. Negizinen, ár túpten 600-800 gramm aralyǵynda ónim alýǵa bolady. Sańyraýqulaq óte muqiiat kútimdi qajet etedi. Aýa-raiyna bailanysty jylyjaidyń temperatýrasyn kúni boiy baqylaýda ustaý kerek. Qazir kúndiz-túni uiyqtamai, ápkemniń qolǵabys berýiniń arqasynda ekeýmiz osy ispen ainalysýdamyz, - deidi jas kásipker.
Baiqaýymyzsha, bul ózi uńǵyl-shuńǵyly kóp sharýa eken. Sańyraýqulaq jylýdy jaqsy kóredi, bólmedegi bolmashy aýa ózgerisi de oǵan qatty áser etedi. Kezdeisoq bakteriiadan da qyrylyp qalýy múmkin. Kóp adamnyń sańyraýqulaq ósirýden boiyn aýlaq salatyny da sondyqtan bolsa kerek. Kásipkerdiń aitýynsha, «Veshenka» sańyraýqulaǵy keremet dámimen qosa, qorektik qýatymen de erekshelenetin kórinedi. Onyń adam aǵzasyndaǵy isik jasýshalarymen kúresetin emdik qasieti de bar ekenin aitady biletinder. Tyń kásiptiń qyr-syryn uǵynyp, odan mol ónim alýdy kózdegen jas kásipkerdiń ónegesi ózi syndy jastarǵa da qozǵaý salary sózsiz.
