Kásipkerler kásibin ózgertip jatyr
ShQO biznesmenderi belsendi túrde kásipteriniń baǵytyn basqa arnaǵa buryp jatyr. Olar endi óz qarajattaryn tek kommertsiialyq emes, sondai-aq áleýmettik mańyzdaǵy nysandardyń qurylysyna jumsamaq. Biyldyń ózinde kásipkerler Óskemen men Semeide 4 balabaqshanyń irgetasyn qalaýdy mejelep otyr. Aimaq basshysy Danial Ahmetov atap ótkendei, osy úlgide endi «biznes qosymsha paidanyń múmkindigin sezine bastaidy».
– «VKgroup» kompaniiasy quny 733 mln.teńge turatyn 250 oryndyqqa shaqtalǵan balabaqshanyń qurylysyn bastady. Joba «Damý» qorymen birlesken bastama negizinde, iaǵni, 8,5 paiyzdyq ústemede qarjylai qoldaý tabady. Kásipkerlerge óte tiimdi kómek dep esepteimin. Osy rette asa mańyzdy eki nárseni atap ótkim keledi. Birinshi – ol biznes áleýmettik salaǵa bet burdy. Ekinshi – óz qarajattaryn quiyp jatyr. Kóp uzamai memlekettik-jekemenshik seriktestik aiasyndaǵy jobalardyń da tiimdi ekenine kóptiń kózi jetedi, – dedi qurylys alańyn aralaǵan Danial Ahmetov.
Osylai, ShQO atqarýshy biligi biýdjetten tys qarajat tartý isine bilek sybana kirisip otyr. Sandardy sóiletsek, Eýropa qaita qurý jáne damý bankimen 40 mlrd.teńgeni quraityn kelisimshartqa qol qoiyldy. Budan bólek, Óskemende 300 tósekke arnalǵan aýrýhananyń jobasy taǵy bar. Aita ketý kerek, MJS boiynsha boi kóteretin balabaqshalar 100 paiyz memlekettik tapsyryspen qamtamasyz etiledi.
https://dalanews.kz/30266
