شقو بيزنەسمەندەرى بەلسەندى تۇردە كاسىپتەرىنىڭ باعىتىن باسقا ارناعا بۇرىپ جاتىر. ولار ەندى ءوز قاراجاتتارىن تەك كوممەرسيالىق ەمەس، سونداي-اق الەۋمەتتىك ماڭىزداعى نىسانداردىڭ قۇرىلىسىنا جۇمساماق. بيىلدىڭ وزىندە كاسىپكەرلەر وسكەمەن مەن سەمەيدە 4 بالاباقشانىڭ ىرگەتاسىن قالاۋدى مەجەلەپ وتىر. ايماق باسشىسى دانيال احمەتوۆ اتاپ وتكەندەي، وسى ۇلگىدە ەندى «بيزنەس قوسىمشا پايدانىڭ مۇمكىندىگىن سەزىنە باستايدى».
– «VKgroup» كومپانياسى قۇنى 733 ملن.تەڭگە تۇراتىن 250 ورىندىققا شاقتالعان بالاباقشانىڭ قۇرىلىسىن باستادى. جوبا «دامۋ» قورىمەن بىرلەسكەن باستاما نەگىزىندە، ياعني، 8،5 پايىزدىق ۇستەمەدە قارجىلاي قولداۋ تابادى. كاسىپكەرلەرگە وتە ءتيىمدى كومەك دەپ ەسەپتەيمىن. وسى رەتتە اسا ماڭىزدى ەكى نارسەنى اتاپ وتكىم كەلەدى. ءبىرىنشى – ول بيزنەس الەۋمەتتىك سالاعا بەت بۇردى. ەكىنشى – ءوز قاراجاتتارىن قۇيىپ جاتىر. كوپ ۇزاماي مەملەكەتتىك-جەكەمەنشىك سەرىكتەستىك اياسىنداعى جوبالاردىڭ دا ءتيىمدى ەكەنىنە كوپتىڭ كوزى جەتەدى، – دەدى قۇرىلىس الاڭىن ارالاعان دانيال احمەتوۆ.
وسىلاي، شقو اتقارۋشى بيلىگى بيۋدجەتتەن تىس قاراجات تارتۋ ىسىنە بىلەك سىبانا كىرىسىپ وتىر. سانداردى سويلەتسەك، ەۋروپا قايتا قۇرۋ جانە دامۋ بانكىمەن 40 ملرد.تەڭگەنى قۇرايتىن كەلىسىمشارتقا قول قويىلدى. بۇدان بولەك، وسكەمەندە 300 توسەككە ارنالعان اۋرۋحانانىڭ جوباسى تاعى بار. ايتا كەتۋ كەرەك، مجس بويىنشا بوي كوتەرەتىن بالاباقشالار 100 پايىز مەملەكەتتىك تاپسىرىسپەن قامتاماسىز ەتىلەدى.
https://dalanews.kz/30266
