Aýdan Táýelsizdiktiń 30 jyldyq torqaly toiyna tyńǵylyqty daiyndalǵan. Mereke qarsańynda kásipkerlerdiń atsalysýymen ólkede jańa meshit, balabaqsha jánge mádeni eskertkishter ashylǵan. Birqatar kósheler abattandyrylyp, joldar jóndelgen.
"Turmysy tómen jáne kópbalaly otbasylarǵa kórsetilip jatqan kómektiń kólemi jyl ótken saiyn artyp keledi. Aýdan turǵyndarynyń "Eńbek" baǵdarlamasyna qyzyǵýshylyǵy joǵary. Osynaý joba aiasynda kásip ashyp, biznes bastaýǵa qulyq tanytqan aýdan turǵyndaryna qaitarymsyz grant berildi. Sonyń nátijesinde kóptegen kópbalaly otbasylar men az qamtylǵan januialar jeke kásibin bastaýǵa múmkindik aldy", – deidi Nurjan Ábdikárimuly.
Budan bólek demeýshilerdiń kómegimen "Biz birgemiz" aktsiiasy aiasynda áleýmettik jaǵynan az qamtylǵan otbasylarǵa dári-dármek taratylǵan. Kópbalaly otbasylardyń balalaryna qysqy kiim-keshek berilipti.
"Shyǵys Qazaqstanda meditsina salasyna basym kóńil bólinetinin bilesizder. Abai aýdany da bul tendentsiiadan qalyspai keledi. Aýdandyq aýrýhanada koronavirýspen kúreske barlyq jaǵdai jasalǵan. Turǵyndardyń densaýlyǵy basty nazarda", – deidi ákim.
Aýdanda memlekettik qyzmet kórsetýdiń sapasy joǵary deńgeide. Turǵyndarǵa yńǵaily bolýy úshin Abai aýdanynyń barlyq eldi-mekenderinde óz-ózine qyzmet kórsetý bólimsheleri ashylǵan.
Ákimniń atap ótkenindei aýdanda shaǵyn jáne orta biznesti damytýǵa barynsha qoldaý kórsetilip otyr. Qazirgi tańda Abai aýdanynda myńnan asa kásipker bar. Ilkide aityp ketkendei "Eńbek" baǵdarlamasy aiasynda biznesin dóńgeletip otyrǵan azamattardyń qarasy kóbeiip keledi.
Aýdanda turǵyn-úi máselesi de airyqsha nazarda. Jyl aiaǵyna deiin 32 kópbalaly jáne turmysy tómen otbasylarǵa baspana beriletin bolady. "Birqabatty Shyǵys" jobasy aiasynda salynǵan úilerdiń sapasy jaqsy, qurylysy aiaqtalǵan, qoldanysqa berilýge daiyn tur.
Aýylsharýashylyǵy salasy da qarqyndy damýda. Ólkedegi sharýa qojalyqtarynyń sany 42-ge jetti, sonyń ishinde 20-sy qoi sharýashylyǵymen, al ózge 22 sharýashylyq iri qara ósirýmen ainalysady.
"Aýdannyń áleýmettik-ekonomikalyq ahýalyn jaqsartý jumystary úzdiksiz júrgiziledi", – dedi sóziniń túiininde Abai aýdanynyń ákimi.
