Kárim Másimov raqymshylyqqa ilinbedi, - dep habarlaıdy Dalanews.kz.
Qazaqstan Prezıdentiniń janyndaǵy Keshirim jasaý máseleleri jónindegi komısıa qańtar oqıǵasy boıynsha sottalǵan UQK burynǵy basshysy Kárim Másimovke keshirim jasaýdan bas tartty.
Bul týraly Azattyqqa komısıa múshesi, Májilis depýtaty Marat Bashımov aıtty. Onyń sózinshe, "komısıanyń bul sheshimi endi Prezıdentke jiberiledi".
Eske salaıyq, buǵan deıin májilis depýtaty Ermurat Bapı Ulttyq qaýipsizdik komıtetiniń (UQK) burynǵy tóraǵasy Kárim Másimovten bostandyqqa shyǵý úshin Qańtar týraly bar shyndyqty aıtý suralǵanyn aıtqan bolatyn.
"Másimov uıymdastyrýshy boldy dep oılamaımyn. Sondyqtan batyl málimdeme jasasa, oǵan jumsaq qaraýǵa bolady. Mysaly, ol Qaýipsizdik Keńesi tóraǵasynyń buıryqtaryn oryndaýǵa májbúr bolsa (Qańtar oqıǵasyna deıin ony Nursultan Nazarbaev basqardy). Kárim Másimov uzaq jyl boıy premer-mınıstr jáne Nazarbaevtyń senimdi adamy boldy. Ol onyń jeke tapsyrmalaryn oryndap qana qoımaı, tuńǵysh prezıdenttiń jeke bıznesin de júrgizip otyrdy. Másimov onyń aktıvterin shyǵarýmen aınalysty, ıaǵnı áıgili Qazaqgeıtten keıin Eýropadan shyǵardy, sondaı-aq, eski Qazaqstannyń aktıvterin Ońtústik-SHyǵys Azıa, Qytaı, Shanhaı, Gonkong, Ámirlikterge jiberýmen aınalysty. Másimov barlyq tranzaksıany ashyp, esesine basyna bostandyq surasa, oǵan keshirim berý kerek dep oılaımyn", – dedi Májilis depýtaty Ermurat Bapı.
Bapıdiń pikirinshe, Kárim Másimov Qańtar oqıǵasyn uıymdastyra almady. Onyń aıtýynsha, Másimov shyn máninde ne bolǵanyn baıandap, basty uıymdastyrýshynyń atyn ataýy kerek.
"Shyǵarylǵan aktıvter týraly aqparatty bilý ony túrmede ustaýdan góri mańyzdy. Onyń qamaýda otyrǵanynan halyqqa eshqandaı paıda joq", - deıdi Bapı.
Al 2023 jyly 24 sáýirde Astananyń qylmystyq ister jónindegi mamandandyrylǵan aýdanaralyq soty QR Ulttyq qaýipsizdik komıtetiniń eks-tóraǵasy Kárim Másimovke, Ulttyq qaýipsizdik komıteti tóraǵasynyń eks-orynbasarlary Ánýar Sadyqulov, Dáýlet Erǵojın, Marat Osıpovke qatysty qylmystyq is boıynsha úkim shyǵarǵan bolatyn.
Sot isti "Asa qupıa" degen belgimen qarady. Kárim Másimov QR Qylmystyq kodeksiniń 175-babynyń 1-bóligi, 179-babynyń 3-bóligi, 362-babynyń 4-bóliginiń 3-tarmaǵy boıynsha kináli dep tanylyp, 18 jyl bas bostandyǵynan aıryldy. Sonymen qatar, memlekettik qyzmette ómir boıy qyzmet ete almaıtyny jáne múlki tárkilenetini aıtyldy. Kárim Másimov buǵan qosa general sheni men memlekettik nagradalarynan aıyryldy.
Al onyń orynbasary Dáýlet Erǵojın Qylmystyq kodekstiń 179-babynyń 3-bóligi, 362-babynyń 4-bóligi 3-tarmaǵy boıynsha kináli dep tanylyp, 15 jylǵa bas bostandyǵynan aıyryldy.
Keıin apelásıalyq saty K.Másimovke, A. Sadyqulovqa jáne D. Erǵojınge qatysty birinshi satydaǵy sot úkimin qaýipsizdigi eń joǵary mekemeden qaýipsizdigi ortasha mekemede jazasyn óteý boıynsha ózgertti.
