Aqorda saityna jariialanǵan baiandamasyna qaraǵanda jiynda koronavirýsqa qarsy kúres jumystaryn kúsheitý, tótenshe jaǵdaidaǵy qaýipsizdikti qamtamasyz etý, eldegi áleýmettik jaǵdaidy turaqtandyrý, ulttyq ekonomikany qoldaý, jańa jaǵdaida sheshim qabyldaýdyń jańa úlgisi máseleleri talqylanǵan.
Toqaev Nur-Sultan men Almatynyń karantinge jabylǵanyn der kezinde qolǵa alynǵan shara dep baǵalaidy. Sondai-aq, tótenshe jaǵdaida qalymystyń artý múmkindigin aityp, onyń aldyn alý, halyqtyń qaýipsizdigin saqtaýǵa tiisti quzyrly oryndarǵa naqty tapsyrmalar júktegen.
– Almatydaǵy karantinnen jastar aimaqqa ketti. BAQ-taǵy málimet boiynsha, 19-20 naýryzda Almatydan 102 myńnan astam adam, 15 myń kólik shyǵyp ketken. Bular stýdentter, bazar, qyzmet kórsetý, saýda salasyndaǵy jumysshylar. Jumyssyz jastardy «Jol kartasy» boiynsha, aimaqtarda kóktemgi egis, qurylys jáne de basqa jumystarǵa aqy tólep tartý kerek, – depti bir sózinde Memleket basshysy.
Pandemiia dúrbeleńinde ultaralyq qatynas kún tártibinen syrǵyp túsip qalǵanyn jáne bul tynyshtyq aldamshy ekenin nazarǵa alǵan prezident kóktemgi egis naýqanynda bolýy múmkin jerge, sýǵa talas daýlaryna qatysty derekti dereý jetkiýge quzyrly oryndarǵa júktepti.
Kún demei, tún demei demalyssyz qyzmet atqaryp júrgen dáriger, politsiia jáne basqa salanyń qyzmetkerlerine alǵysyn bildirgen Memleket basshysy olarǵa bir ailyq jalaqy kóleminde syiaqy berýge tapsyrma júktepti.
Turǵyndardyń ál-aýhatyn ustap turý úshin kúrdeli qadamdarǵa barýǵa týra kelgenin atap ótken Toqaev karantin kezinde nesieni shegerý, qaryz óstemin eseptemeý, salyqtan bosatý siiaqty qadamdarǵa barǵanyn baiandapty.
Prezidenttiń aitýynsha, karantinnen Almatynyń ózinde 500 myńdai adam qarjysyz qinalyp qalǵan.
– Sondyqtan, tótenshe jaǵdai kezinde osy jaǵdaiǵa bailanysty qarjysyz qalyp, qiyndyq kórip otyrǵan jandarǵa 1 AEK (42 500 tenge) kóleminde járdemaqy taǵaiyndaimyn. Jalpylama alǵanda mundai kómekti elimiz boiynsha, 1,5 millionnan astam turǵyn alady, – depti Memleket basshysy.
Bul krizis memlekettik apparat pen otandyq bizneske synaq jáne odan sabaq alý kerektigin aitqan Toqaev kriziske qarsy salyq jeńildigi men jergilikti jerdegi qoldaý shyǵyndaryn eseptemegende 4,4 trln teńge nemese 10 mlrd dollar jumsalatynyn málimdegen.
