Toıshyl qaýym astyrtyn, jasyryn toı ótkizip, ánshini qýanyshyna ortaqtasýǵa shaqyrǵan eken. Buǵan koronavırýs ta kedergi keltire almapty. Bul jaıynda ánshi álemjelidegi paraqshasynda ejiktep jazypty.
"Meni toı ánshisi deıtin kóptiń sózine ómirimde qatty qýanǵanym boldy. Ol karantınniń ishinde. Jasyryn toıǵa kirip júrgende….
Pandemıa degen indet elimizge kelgeli biraz toılar jasyryn boldy. Al sol jasyryn toılarda meni halqym shaqyryp talaıyn elmen birge atqardyq.
Atqaryp ta júrmiz. Endi sonyń jemisi!
Karantınde úı saldym, Qanshama ózim ómirde kórmegen kásipterdi bastap kórdim. Kólik jýý ortalyǵy, balalar dúkeni.
Kómek, járdem (ol aıtylmaıdy). Ánderdi topyrlatyn jazbasam da Alla basymdaǵy baǵymnan aıyrǵan joq. Eldiń ortasyndamyn. SHÚKİR.
Qatty janyp ketip jatqan juldyzdy da kórgenimiz joq. Óıtkeni eldiń oıy vaksına, pandemıa, kartop, sábiz, shóp. Obshym kóp ýaıym, qaıǵy", - deıdi ánshi.
Óner ıesi Jaratqannyń árkimge bir qabilet bergenin atap ótti. El kóp synǵa alatyn ánshilerdiń Alla bergen daýyspen kún kóretinin jetkizdi.
"Alla bergeninen taımasyn dep ózińizge unaǵan tirlikti jasaı berińizder aǵaıyn. Alla etikshige etik tigý qabilet berdi. Ol sol eńbegimen otbasyn asyraıdy.
Ánshige daýys berdi Alla. Sonymen biz de solaı kún kóremiz. Alla bergen qabiletpen alǵa qaraı júre berińiz. Qalǵany Allaǵa ǵana aıan", - dep túıindedi sózin ol.
…
Densaýlyq mınıstrliginiń vırýstyń tar keńistikte tez taralatynyn aıtyp, toı-tomalaqqa tyıym salǵanyna biraz boldy. Bas sanıtarlar qaýlydan-qaýly qabyldap, merekelik sharalardy shektep jatqany toıshyl qaýymdy toqtatar emes. Al ánshiler qaýymy astyrtyn toıǵa baryp, án salǵanyn maqtanyshpen aıtýda. Soǵan qaraǵanda bularǵa sot joqtaı kórinedi.
Sonda sóz júzindegi shekteýden kimge, qandaı paıda? Budan koronavırýstyń taralýy tejelmesi aıdan anyq.
Aıta ketelik, kúni keshe mınıstr Soı koronavırýstyń taralý qarqynyna qatysty boljam jasap
birneshe óńirde terapıa tósekteriniń tapshylyǵy týyndap, bul óz kezeginde halyq arasynda ólimniń kúrt ósýine ákelýi múmkin ekenin aıtqan.
Soı qazirgi kezdegi karantındik sharalarǵa qaramastan birqatar aımaqtarda saltanatty is-sharalar kóptegen adamdardyń qatysýymen jáne karantın talaptaryn óreskel buzýmen jalǵasyp jatqanyn tilge tıek etken Osyǵan baılanysty ol jergilikti atqarýshy organdarǵa baqylaý toptarynyń jumysyn kúsheıtýdi tapsyrýdy suraǵan.
https://dalanews.kz/del-qazir/65708-toyga-shaqyrtu-alsangyz-barmas-buryn-on?fbclid=IwAR3Cz55K_tilZcZv38Tbe_FhKzIPBsz0Hn1ttxMHNIBE8jcGSqukBZRo7Wc
