Álemge áigili amerikalyq reper Kane Ýest araǵa 13 jyl salyp Qazaqstanǵa qaita kelýdi josparlap otyr. Bul joly óner iesi jabyq saltanatty keshte emes, Almatynyń Ortalyq stadionynda myńdaǵan jankúierdiń aldynda óner kórsetpek, dep habarlaidy kznews.kz.
Uiymdastyrýshylardyń aldyn ala málimetinshe, kontsert 2026 jylǵy 14 tamyzda ótedi. Almaty ákimdigi de qalada osyndai is-shara uiymdastyrylatyny jónindegi aqparatty rastaǵan. Ázirge kontserttiń kúni men ótetin orny ózgergen joq.
Bilet satý bastapqyda 20 shildege josparlanǵanymen, «Qairat» fýtbol klýbymen týyndaǵan uiymdastyrýshylyq máseleni talqylaýǵa bailanysty 21 shilde, saǵat 12:00-ge shegerilgen.
Kane Ýest Qazaqstanǵa buǵan deiin qashan kelgen?
Bul reperdiń Qazaqstanǵa alǵashqy sapary emes. Kane Ýest 2013 jylǵy 31 tamyzda Almatydaǵy Royal Tulip qonaqúiinde ótken Aisultan Nazarbaev pen Álima Boranbaevanyń úilený toiynda óner kórsetken.
Jabyq keshten túsirilgen foto jáne videolar áleýmettik jelige tarap, oqiǵa Qazaqstanda ǵana emes, sheteldik aqparat quraldarynda da keńinen talqylanǵan edi.
Sheteldik basylymdar Kane Ýestiń toidaǵy óneri úshin 3 million dollarǵa deiin gonorar alǵanyn jazdy. Alaida bul soma resmi túrde rastalǵan joq. Reperdi Qazaqstanǵa sol kezdegi prezident Nursultan Nazarbaev shaqyrdy degen aqparat ta taraǵanymen, oǵan qatysty resmi málimdeme bolmady.
2013 jylǵy jabyq keshten 2026 jylǵy úlken stadionǵa
Ol kezde Kane Ýestiń ónerin tek toiǵa shaqyrylǵan qonaqtar tamashalaǵan. Al endi reperdiń Almatydaǵy kontserti keń aýditoriiaǵa arnalyp otyr.
Sodan bergi 13 jyl ishinde Qazaqstannyń saiasi jáne qoǵamdyq ómirinde de aitarlyqtai ózgerister boldy. Nursultan Nazarbaev 2019 jylǵy 19 naýryzda prezidenttik ókiletin toqtatatynyn málimdedi. Al Aisultan Nazarbaev 2020 jylǵy 16 tamyzda Londonda 29 jasynda qaitys boldy.
Osylaisha, Kane Ýest bul joly múlde basqa formatta jáne basqa kezeńdegi Qazaqstanǵa oralmaq.
Almatydaǵy kontsert biletteri qansha turady?
Uiymdastyrýshylar taratqan bastapqy aqparatqa sáikes, kontsert biletteriniń baǵasy 120 myńnan 350 myń teńgege deiin bolýy múmkin.
Almatydaǵy shoý Ye esimimen tanylǵan reperdiń álemdik týry aiasynda ótedi dep josparlanǵan. Kontsert baǵdarlamasyna onyń ár jyldary jaryq kórgen tanymal ánderi engizilýi yqtimal.
Kane Ýestiń keiingi shoýlary aýqymdy vizýaldy qoiylymdarymen erekshelenedi. Sonyń biri – oryndaýshynyń sahnaǵa alyp sferanyń ústinde shyǵýy. Almatydaǵy kontsertte de osyǵan uqsas áserli sahnalyq sheshimder qoldanylýy múmkin.
