Kámshat Joldybaeva “Ánshiler men akterler bizdiń nanymyzdy tartyp alyp jep júr” degen jýrnalıserdiń bar bolǵany álsiz maman ekenin aıtty. Olardyń bul sózin álsizdiń janaıqaıy dep biletinin jetkizdi. Bul týraly Astana arnasynyń “Syrlasý” baǵdarlamasynda aıtyldy dep habarlaıdy stan.kz saıty. 

“Ánshilerdiń baǵdarlamany júrgizýin siz qabyldaı alasyz ba? Osyny durys úrdis dep oılaısyz ba?” – dep surady baǵdarlama júrgizýshisi Áıgerim Seıfolla. Bul saýaldyń qoıylatynyn Kámshat Joldybaeva kútken syńaıly. Sebebi, ánshi múdirmesten kópten berý aıtqysy kelip júrgen oıyn jetkizdi.

“Árıne, qabyldaı alamyn. Barlyǵyn birdeı baǵalap, bir baǵa berý múmkin emes. Tyńdap, kórip baryp qana baǵasyn beresiń. Ánshi myqty júrgizip tursa, nege bul múmkindikti paıdalanbasqa?! Ártúrli pikir, ıaǵnı sizdiń áriptesterińiz “Oıbaı, ánshiler nemese akterler bizdiń nanymyzdy tartyp alyp jep júr. Nege árkim óz isiniń mamany bolmaıdy? Qaldyrsyn bizge sol múmkindikti” dep aıtyp jatady. Men muny álsiz mamandardyń nemese álsiz jandardyń aıtatyn janaıqaıy dep oılaımyn. Sen myqty bolsań, eshqashan dalada qalmaısyń”, – deıdi ol.

Ánshiniń bul sózderin estip otyrǵan jýrnalıs Áıgerim Seıfolla kúlkige erik berdi. “Áriptesterim, Kámshatty osy pikiri úshin jan-jaqtan jeýge daıyndalyńdar” dedi ol kúlip.