Oralda bet-álpetti tanityn kameralar sot shekteýin buzǵan azamatty túngi klýbtan anyqtady, dep habarlaidy dalanews.kz.
36 jastaǵy er adam sot sheshimimen bostandyǵy shektelip, oǵan keshki saǵat 22:00-den keiin oiyn-saýyq oryndaryna barýǵa tyiym salynǵan. Soǵan qaramastan, ol túngi klýbqa kirgen.
Klýbtaǵy kameralar onyń beinesin birden bazaǵa tirkelgen adamdarmen salystyryp, sáikestikti anyqtaǵan. Aqparat jedel basqarý ortalyǵyna túsip, kóp uzamai patrýldik politsiia kelip, er adamdy ustap, bólimge jetkizdi.
Tekserý barysynda onyń rasynda probatsiia esebinde turǵany jáne sot talabyn buzǵany belgili boldy.
Qazir bul derek boiynsha tekseris júrip jatyr. Jyl basynan beri osyndai júie arqyly 56 adam anyqtalǵan.
