Resei Memlekettik Dýmasynyń depýtaty Svetlana Jýrova Milanda ótken Olimpiada oiyndarynda chempion atanǵan qazaqstandyq mánerlep syrǵanaýshy Mihail Shaidorovtyń jeńisine qatysty pikir bildirdi, dep habarlaidy Dalanews.kz.
Onyń aitýynsha, Shaidorovtyń jeńisi 1994 jylǵy Lillehammer Olimpiadasyn eske túsirgen. Sol kezde altyn medaldi qazirgi tańda Mihaildyń jattyqtyrýshysy bolyp otyrǵan Aleksei Ýrmanov jeńip alǵan edi.
«Qazaqstan úshin qýanyshtymyn. Shynymdy aitsam, mundai finaldy 32 jyldan beri kórgen joqpyn. Lillehammerde basty favoritter qatelesip jatqanda, Aleksei Ýrmanov minsiz óner kórsetip, chempion atanǵan edi. Qazir sol Ýrmanov Olimpiada chempiony bolǵan Mihaildyń bapkeri. Bul – simvolikalyq sát», – dedi Jýrova.
Sonymen qatar depýtat Shaidorovtyń daiyndyq protsesine toqtalyp, onyń Reseidegi jattyǵýlary nátijege áser etkenin atap ótti.
«Meniń bilýimshe, ol Sochide daiyndaldy. Bizdiń el oǵan óz memleketiniń namysyn qorǵap, Olimpiadaǵa daiyndalýyna múmkindik berdi. Onyń osyndai deńgeide jinalyp, joǵary nátije kórsetýi – úlken jetistik», – dedi ol.
Jýrova jarystyń basty favoriti sanalǵan amerikalyq Ilia Malininniń sátsiz óner kórsetýine de toqtaldy. Onyń sózinshe, birqatar myqty sportshylar erkin baǵdarlamada qatelik jibergen, al Shaidorov bul múmkindikti tiimdi paidalanyp, altyn júldeni ielengen.
