Jýrnalister Túlkibastyń damý qarqynymen tanysty
BAQ ókilderi aldymen meditsina salasy qyzmetkerleriniń merekesi qarsańynda ashylǵan «Dárigerler alleiasy» memorialyna aialdady. Onda turǵyndardyń demalyp, boi sergitýi úshin 500 sharshy metr aýmaqqa yńǵaily oryndyqtar, túngi jaryqtandyrý shamdary ornatylǵan. Sondai-aq, 70-ke jýyq arsha, aq qaiyń kóshetteri otyrǵyzylyp, shym egilgen. Alleia ortasynan dáriger men medbike eskertkishi boi kóterip, «Dárigerlerge myń alǵys!» taqtaishasy ornatylǵan.
Keiin jýrnalister kúrdeli jóndeý jumystary júrip jatqan aýdandyq aýrýhanaǵa aialdady. Meditsinalyq ortalyqtaǵy perzenthana, nevrologiia jáne ginekologiia bólimderi jóndeýden ótip jatyr.
Ǵimarattardyń esik terezeleri men edeni tolyǵymen aýysyp, ishki jáne syrtqy árleý jumystary men elektr, sý júieleri tolyǵymen jańartylady. Syrtqy bóligi jel men jańbyrǵa tózimdi arnaiy jabyndymen qaptalyp, pandýs máselesine de kóńil bólingen.
Al, qurylysy jýyrda aiaqtalǵan jańa arbatqa keshki ýaqytta kelip demalýshylar qatary kún sanap artqan. Demalys aimaǵyna 2 sýburqaq, 8 terbelmeli úlken átkenshek, sapaly oryndyqtar ornatylǵan. Sondai-aq, mádeniet úiimen japsarlas ortalyq saiabaqqa túngi jaryqshamdar balalar oinaityn attraktsiondar jáne jalpy kópshilikke arnalǵan sporttyq alańsha (vorkaýt) qoiyldy. Saiabaq ishinde talshyn, emen, qaraǵai, eren, úieńki, shyrsha aǵashtary otyrǵyzylǵan.
