Keńes tóraǵasy, Májilis depýtaty Mádi Ahmetov atap ótkendei, sońǵy jyldary baǵdarlamaǵa 90 myńǵa jýyq adam qatysyp, onyń tek 30%-y ǵana turaqty jumyspen qamtylǵan.
– Memlekettik organdardyń málimetinshe, 77 myńnan astam jas qazaqstandyq jumyssyz. Sonymen qatar, 250 myń jas – esh jerde jumys istemeitin jáne oqymaityn NEET sanatyndaǵylar. Bul aqparattyq taldaý sandar tómendetilip kórsetilgen jáne is júzinde jumys istemeitin jastar áldeqaida kóp degen qorytyndy jasaýǵa ákeledi. Osy sanattaǵy jastarmen naqty jumystyń joqtyǵy baiqalady, – dedi Mádi Ahmetov.
Óz kezeginde Eńbek jáne halyqty áleýmettik qorǵaý vitse-ministri Erjan Bijanov jastar arasynda jumyspen qamtý paiyzyn arttyrý úshin osy saladaǵy qyzmetter enbek.kz elektrondy eńbek birjasy arqyly da kórsetiletinin aitty. Ótken 10 aida Elektrondyq eńbek birjasynyń kómegimen 111 myń adam jumyssyz retinde tirkelgen, onyń 37,8%-y – jastar.
– Osy jyldyń shilde aiynda skills.enbek.kz qysqa merzimdi kásiptik oqytý saityn iske qostyq. Onda aspazdyq, kosmetologiia, zańgerlik jáne býhgalterlik qyzmetter siiaqty jáne t.b. baǵyttar boiynsha 91 kýrs qol jetimdi. Portal arqyly barlyǵy 5200 jumyssyz azamat oqysa, olardyń 2300-i jas býyn ókilderi, – dedi vitse-ministr.
Osy oraida Keńes músheleri skills.enbek.kz.saityna kiretinderdiń tym azdyǵyn alǵa tartty.
– Elektrondyq eńbek birjasyna kirip, ózińiz úshin bos jumys ornyn tabýǵa tyrysyp kórińiz. Buǵan jarty kún ýaqytyńyz ketedi. Al kýrstarǵa arnalǵan saittaryńyz she? Dál qazir syrtqa shyǵyp, adamdardan suraiyqshy. Mundai portaldyń bar ekenin eshkim bilmeitinine senimdimin, – dedi Keńes tóraǵasy Erjan Birjanovqa qarata.
«Atameken» UKP Adami kapitaldy damytý departamentiniń direktory Azamat Beisenbenov aýyldardaǵy maman tapshylyǵy máselesin kóterdi. Máselen, aýyl sharýashylyǵy salasy boiynsha bitirgen túlekterdiń 7%-y ǵana mamandyq boiynsha jumys isteidi.
– Olardyń birazy bolashaq mamandyqtaryn bilmestikpen tańdaǵan. Bir ýniversitette mal dárigeri mamandyǵyn alǵan 30 túlektiń tek ekeýi ǵana mamandyǵy boiynsha jumys isteidi. Sondyqtan bul jerde jumysshy mamandyqtardy dáripteý boiynsha jumystar júrgizilýi tiis, – dedi Azamat Beisenbenov.
Partiia baspasóz qyzmetiniń málimetinshe, Jastar keńesiniń músheleri sailaýaldy ýádelerdiń oryndalýyn baqylaýda ustaidy. Biylǵy jyly «Alǵashqy jumys orny» jobasy aiasynda 1,5 myń adam jumysqa ornalastyrylyp, 7,8 myń jas kásipker óz biznes-ideialaryn iske asyrýǵa granttar alǵan, sondai-aq, «Biznes bastaý» jobasy boiynsha 10,5 myń jas azamat oqýǵa jiberildi.
Jiyn qorytyndysy boiynsha Keńes Eńbek jáne halyqty áleýmettik qorǵaý ministrligine jáne basqa da memlekettik organdarǵa birqatar usynymdar ázirledi. Olardyń ishinde halyqqa skills.enbek.kz portaly týraly kóbirek aqparat berip, habardar etý, NEET sanatyndaǵy jastarmen júieli túrde naqty jumysty qolǵa alý usynyldy.
