كەڭەس ءتوراعاسى، ءماجىلىس دەپۋتاتى ءمادي احمەتوۆ اتاپ وتكەندەي، سوڭعى جىلدارى باعدارلاماعا 90 مىڭعا جۋىق ادام قاتىسىپ، ونىڭ تەك 30%-ى عانا تۇراقتى جۇمىسپەن قامتىلعان.
– مەملەكەتتىك ورگانداردىڭ مالىمەتىنشە، 77 مىڭنان استام جاس قازاقستاندىق جۇمىسسىز. سونىمەن قاتار، 250 مىڭ جاس – ەش جەردە جۇمىس ىستەمەيتىن جانە وقىمايتىن NEET ساناتىنداعىلار. بۇل اقپاراتتىق تالداۋ ساندار تومەندەتىلىپ كورسەتىلگەن جانە ءىس جۇزىندە جۇمىس ىستەمەيتىن جاستار الدەقايدا كوپ دەگەن قورىتىندى جاساۋعا اكەلەدى. وسى ساناتتاعى جاستارمەن ناقتى جۇمىستىڭ جوقتىعى بايقالادى، – دەدى ءمادي احمەتوۆ.
ءوز كەزەگىندە ەڭبەك جانە حالىقتى الەۋمەتتىك قورعاۋ ۆيسە-مينيسترى ەرجان بيجانوۆ جاستار اراسىندا جۇمىسپەن قامتۋ پايىزىن ارتتىرۋ ءۇشىن وسى سالاداعى قىزمەتتەر enbek.kz ەلەكتروندى ەڭبەك بيرجاسى ارقىلى دا كورسەتىلەتىنىن ايتتى. وتكەن 10 ايدا ەلەكتروندىق ەڭبەك بيرجاسىنىڭ كومەگىمەن 111 مىڭ ادام جۇمىسسىز رەتىندە تىركەلگەن، ونىڭ 37،8%-ى – جاستار.
– وسى جىلدىڭ شىلدە ايىندا skills.enbek.kz قىسقا مەرزىمدى كاسىپتىك وقىتۋ سايتىن ىسكە قوستىق. وندا اسپازدىق، كوسمەتولوگيا، زاڭگەرلىك جانە بۋحگالتەرلىك قىزمەتتەر سياقتى جانە ت.ب. باعىتتار بويىنشا 91 كۋرس قول جەتىمدى. پورتال ارقىلى بارلىعى 5200 جۇمىسسىز ازامات وقىسا، ولاردىڭ 2300ء-ى جاس بۋىن وكىلدەرى، – دەدى ۆيسە-مينيستر.
وسى ورايدا كەڭەس مۇشەلەرى skills.enbek.kz.سايتىنا كىرەتىندەردىڭ تىم ازدىعىن العا تارتتى.
– ەلەكتروندىق ەڭبەك بيرجاسىنا كىرىپ، ءوزىڭىز ءۇشىن بوس جۇمىس ورنىن تابۋعا تىرىسىپ كورىڭىز. بۇعان جارتى كۇن ۋاقىتىڭىز كەتەدى. ال كۋرستارعا ارنالعان سايتتارىڭىز شە؟ ءدال ءقازىر سىرتقا شىعىپ، ادامداردان سۇرايىقشى. مۇنداي پورتالدىڭ بار ەكەنىن ەشكىم بىلمەيتىنىنە سەنىمدىمىن، – دەدى كەڭەس ءتوراعاسى ەرجان ءبىرجانوۆقا قاراتا.
«اتامەكەن» ۇكپ ادامي كاپيتالدى دامىتۋ دەپارتامەنتىنىڭ ديرەكتورى ازامات بەيسەنبەنوۆ اۋىلدارداعى مامان تاپشىلىعى ماسەلەسىن كوتەردى. ماسەلەن، اۋىل شارۋاشىلىعى سالاسى بويىنشا بىتىرگەن تۇلەكتەردىڭ 7%-ى عانا ماماندىق بويىنشا جۇمىس ىستەيدى.
– ولاردىڭ ءبىرازى بولاشاق ماماندىقتارىن بىلمەستىكپەن تاڭداعان. ءبىر ۋنيۆەرسيتەتتە مال دارىگەرى ماماندىعىن العان 30 تۇلەكتىڭ تەك ەكەۋى عانا ماماندىعى بويىنشا جۇمىس ىستەيدى. سوندىقتان بۇل جەردە جۇمىسشى ماماندىقتاردى دارىپتەۋ بويىنشا جۇمىستار جۇرگىزىلۋى ءتيىس، – دەدى ازامات بەيسەنبەنوۆ.
پارتيا باسپا ءسوز قىزمەتىنىڭ مالىمەتىنشە، جاستار كەڭەسىنىڭ مۇشەلەرى سايلاۋالدى ۋادەلەردىڭ ورىندالۋىن باقىلاۋدا ۇستايدى. بيىلعى جىلى «العاشقى جۇمىس ورنى» جوباسى اياسىندا 1،5 مىڭ ادام جۇمىسقا ورنالاستىرىلىپ، 7،8 مىڭ جاس كاسىپكەر ءوز بيزنەس-يدەيالارىن ىسكە اسىرۋعا گرانتتار العان، سونداي-اق، «بيزنەس باستاۋ» جوباسى بويىنشا 10،5 مىڭ جاس ازامات وقۋعا جىبەرىلدى.
جيىن قورىتىندىسى بويىنشا كەڭەس ەڭبەك جانە حالىقتى الەۋمەتتىك قورعاۋ مينيسترلىگىنە جانە باسقا دا مەملەكەتتىك ورگاندارعا ءبىرقاتار ۇسىنىمدار ازىرلەدى. ولاردىڭ ىشىندە حالىققا skills.enbek.kz پورتالى تۋرالى كوبىرەك اقپارات بەرىپ، حاباردار ەتۋ، NEET ساناتىنداعى جاستارمەن جۇيەلى تۇردە ناقتى جۇمىستى قولعا الۋ ۇسىنىلدى.
