"Jetigen" aerodromynda jóndeý jumystaryn júrgizýge tiis bolǵan "K-Dorstroy" kompaniiasy memleketke 1 mlrd 67 mln teńge qaitardy. Bul týraly Bas áskeri prokýratýra málimdedi, dep habarlaidy Dalanews.kz.
Astana qalasynyń mamandandyrylǵan aýdanaralyq ekonomikalyq sotynda Qorǵanys ministrliginiń "K-Dorstroy" AQ-ǵa aryzy qaraldy. Nátijesinde 1 mlrd 36 mln teńge avans pen turaqsyzdyq úshin 31 mln teńge óndirildi.
Kompaniia Almaty oblysy Ile aýdanyndaǵy "Jetigen" aerodromynyń ushý alańyna kúrdeli jóndeý jumystaryn júrgizýge tiis bolǵan. Biraq kelisimshart talaptaryn oryndamai kelgen.
Bas áskeri prokýratýra birqatar sharalar qabyldap, ádilet organdaryna qadaǵalaý aktisin engizdi. Nátijesinde keltirilgen shyǵyn tolyq kólemde ótelip, boryshker memleket kirisine 1 mlrd 67 mln teńge aýdardy.
Eske salaiyq, 2020 jyldyń 10 sáýirinde Qorǵanys ministrligine qarasty mekeme men "K-Dorstroi" AQ arasynda Almaty oblysy Ile aýdany "Jetigen" áýeailaǵynyń ushý alańynyń elementterin kúrdeli jóndeý boiynsha shart jasaldy. Úsh jyldyq kelisimshart somasy 12,2 mlrd teńgeden asty: 2020 jyly kompaniia 137 mln teńgege, 2021 jyly 7 mlrd teńgege jáne 2022 jyly 5 mlrd teńgege jumysty oryndaýǵa tiis edi
2022 jyldyń 13 sáýirinde qosymsha kelisimge qol qoiyldy, oǵan sáikes sharttyń qoldanylý merzimi 2023 jylǵy 30 qarashaǵa deiin uzartyldy.
2022 jyldyń 10 qazanynda sharttyń qoldanylý merzimin 2025 jyldyń 30 qarashasyna deiin uzartýdy kózdeitin taǵy bir qosymsha kelisim jasaldy. Al qarjylandyrý bastapqy 12,2 mlrd teńgeden 23,9 mlrd teńgege deiin kóbeidi.
2022 jyldyń 29 maýsymynda "K-Dorstroi" AQ-ǵa 1 mlrd 36 mln teńge somasynda avans tólendi.
