"جەتىگەن" اەرودرومىندا جوندەۋ جۇمىستارىن جۇرگىزۋگە ءتيىس بولعان "K-Dorstroy" كومپانياسى مەملەكەتكە 1 ملرد 67 ملن تەڭگە قايتاردى. بۇل تۋرالى باس اسكەري پروكۋراتۋرا مالىمدەدى، دەپ حابارلايدى Dalanews.kz.
استانا قالاسىنىڭ مامانداندىرىلعان اۋدانارالىق ەكونوميكالىق سوتىندا قورعانىس مينيسترلىگىنىڭ "K-Dorstroy" اق-عا ارىزى قارالدى. ناتيجەسىندە 1 ملرد 36 ملن تەڭگە اۆانس پەن تۇراقسىزدىق ءۇشىن 31 ملن تەڭگە ءوندىرىلدى.
كومپانيا الماتى وبلىسى ىلە اۋدانىنداعى "جەتىگەن" اەرودرومىنىڭ ۇشۋ الاڭىنا كۇردەلى جوندەۋ جۇمىستارىن جۇرگىزۋگە ءتيىس بولعان. ءبىراق كەلىسىمشارت تالاپتارىن ورىنداماي كەلگەن.
باس اسكەري پروكۋراتۋرا ءبىرقاتار شارالار قابىلداپ، ادىلەت ورگاندارىنا قاداعالاۋ اكتىسىن ەنگىزدى. ناتيجەسىندە كەلتىرىلگەن شىعىن تولىق كولەمدە وتەلىپ، بورىشكەر مەملەكەت كىرىسىنە 1 ملرد 67 ملن تەڭگە اۋداردى.
ەسكە سالايىق، 2020 جىلدىڭ 10 ساۋىرىندە قورعانىس مينيسترلىگىنە قاراستى مەكەمە مەن "ك-دورستروي" اق اراسىندا الماتى وبلىسى ىلە اۋدانى "جەتىگەن" اۋەايلاعىنىڭ ۇشۋ الاڭىنىڭ ەلەمەنتتەرىن كۇردەلى جوندەۋ بويىنشا شارت جاسالدى. ءۇش جىلدىق كەلىسىمشارت سوماسى 12،2 ملرد تەڭگەدەن استى: 2020 جىلى كومپانيا 137 ملن تەڭگەگە، 2021 جىلى 7 ملرد تەڭگەگە جانە 2022 جىلى 5 ملرد تەڭگەگە جۇمىستى ورىنداۋعا ءتيىس ەدى
2022 جىلدىڭ 13 ساۋىرىندە قوسىمشا كەلىسىمگە قول قويىلدى، وعان سايكەس شارتتىڭ قولدانىلۋ مەرزىمى 2023 جىلعى 30 قاراشاعا دەيىن ۇزارتىلدى.
2022 جىلدىڭ 10 قازانىندا شارتتىڭ قولدانىلۋ مەرزىمىن 2025 جىلدىڭ 30 قاراشاسىنا دەيىن ۇزارتۋدى كوزدەيتىن تاعى ءبىر قوسىمشا كەلىسىم جاسالدى. ال قارجىلاندىرۋ باستاپقى 12،2 ملرد تەڭگەدەن 23،9 ملرد تەڭگەگە دەيىن كوبەيدى.
2022 جىلدىڭ 29 ماۋسىمىندا "ك-دورستروي" اق-عا 1 ملرد 36 ملن تەڭگە سوماسىندا اۆانس تولەندى.
