Soltústik Qazaqstan oblysy Shal aqyn aýdany Sergeevka qalasynda úiler qańyrap bos qalǵan. Áleýmettik jeli qoldanýshylarynyń biri TikTok jelisinde osyndai video jariialady, dep habarlaidy Dalanews.kz.
Video avtorynyń aitýynsha, bir kóshedegi tórt úide ǵana adam qalǵan, qalǵandary bos.
"Qanshama úi bos jatyr?! Bir ǵana kóshede birneshe úi bos jatyr. Mine bir qatar, mine taǵy bir qatar. Terezelerdiń áinegi synǵan. Qanshama úi, qanshama shyǵyn?! Barlyq jerde jaryq bar, elektr toǵy tartylǵan. Nege bos qalǵan?!" - dedi jeli qoldanýshysy.
Avtordyń sózinshe, munda balalarǵa barlyq jaǵdai jasalǵan.
"Keshe nemerelerimmen birge qalany araladym. Balaǵa kerektiń bári bar", - dedi ol.
Sondai-aq, video avtory qaladaǵy jańa úilerdi de kórsetken.
Jeli qoldanýshylary videoǵa túrli pikir bildirgen. Olardyń arasynan Sergeevka turǵyndary da tabylǵan.
"Jumys tabý qiyn. Keibireýleri vahtalyq rejimmen jumys isteidi. Keibireýleri qalaǵa jumys isteý úshin ketip, turaqtap qalǵan", "Jumys bolsa eshkim eshqaida ketpes edi", "Meniń týyp-ósken jerim, jumys joq, buryn jaqsy edi, 13 jyl buryn kóship kettim, esh ókinbeimin", "Jumys bolmasa jurt qalai turady?!", "Men osyndai úide turamyn, barlyq úi sýyq", - dedi olar.
Aita keteiik, Sergeevka oblys ortalyǵy Petropavl qalasynan ońtústik-batysqa qarai 154 shaqyrymdai jerde ornalasqan.
Eske salaiyq, buǵan deiin Májilis depýtaty Rinat Zaiytov jabylyp qalǵan aýyldar týraly sóz qozǵady. Depýtattyń sózinshe, keiingi 5 jylda ShQO-da 350 aýyl, SQO-da 635, Pavlodar oblysy boiynsha 352 aýyl bos qalǵan. 2024 jyldyń ózinde SQO-da 141 aýyl mártebesinen aiyrylǵan.
Sondai-aq, keiingi eki jylda Qazaqstan kartasynan 80 aýyl joiylyp ketken. Bul týraly Májiliste aýyldyq aýmaqtardy damytý máseleleri jónindegi dóńgelek ústel barysynda depýtat Jigýli Dairabaev málimdegen bolatyn.
