«Habar 24» telearnasynda kórsetilgen «Bizdiń astanamyz» filmi qaladaǵy qoljetimdi turǵyn úi qurylysy týraly qozǵap ótti, dep habarlaidy qala ákimdiginiń resmi saity.
2020 jyly túrli qarjy kózi esebinen (80%-y — jeke investitsiia) 3 mln sharshy metr turǵyn úi salyndy. Memleket basshysynyń elordadaǵy qoljetimdi áleýmettik turǵyn úi qurylysynyń kólemin 3 esege ulǵaitý jónindegi tapsyrmasy oryndaldy. Nur-Sultan ákimdigi bul baǵytta júieli jumys júrgizip keledi. 2018 jyly 1 100 áleýmettik páter paidalanýǵa berilse, 2019 jyly – 2 900, 2020 jyly 7 myńnan astam qala turǵyny jańa turǵyn úidiń kiltin aldy. Al 2021 jyly 10 myńnan astam áleýmettik páter salý josparlanyp otyr.
Qazirgi ýaqytta elordada turǵyn úi kezeginde 48 myńnan astam adam tur.
2019 jyldan bastap baǵdarlamanyń sharttary ózgertildi. Qazir kezekte turǵandar satyp alý quqyǵynsyz baspana ala alady. Alaida shartty merzimsiz uzartý quqyǵyna ie bolady.
Áleýmettik turǵyn úige azamattardyń 11 sanaty úmitker bola alady. Budan basqa, kópbalaly, tolyq emes otbasylar jáne múgedek bala tárbielep otyrǵan otbasylar «Baqytty otbasy» baǵdarlamasy boiynsha nesielendirý aiasynda ákimdikten bastapqy jarnany óteý úshin 1,5 mln teńgege sertifikat ala alady.
«Eki jyl buryn ata-anam áleýmettik baǵdarlama boiynsha páter aldy. Bul jańa úi. Olarmen birge halyqtyń áleýmettik az qamtylǵan toptary, iaǵni kópbalaly otbasylar, múmkindigi shekteýli jandar, t.b. baspanaly boldy. Men PIK quramynda barmyn jáne jurttyń bir-birin óte belsendi qoldaitynyn, azamattyq ustanymyn kórsetetinin, óz úiin jaqsartýǵa umtylatynyn baiqadym», - dedi «Mádeni Astana» qoǵamdyq birlestiginiń ókili Asqar Japarov.
Aita keteiik, Elorda kúni Nur-Sultanda turǵyn úi kezeginde turǵan 400 otbasy kópten kútken baspanasynyń kiltin aldy. Olardyń ishinde jetim balalar, erekshe qajettilikteri bar bala tárbielep otyrǵan otbasylar, tolyq emes otbasylar, múgedekter, zeinetkerler jáne t.b. bar.
Buǵan deiin qala ákimi Altai Kólginov málim etkendei, Elbasynyń bastamasymen qolǵa alynǵan «Jumys isteitin jastarǵa jalǵa beriletin baspana» baǵdarlamasy biyl da jalǵasady. Osy baǵdarlama aiasynda jyl sońyna deiin taǵy 1 myńnan astam jas baspanaly bolady.
«Osy myń páterden bólek, biyl jyl basynda taǵy 350 jas páter kiltin aldy. Sonymen qatar, 2021 jyly jastar úshin arnaiy turǵyn úi baǵdarlamasyn iske qosýdy josparlap otyrmyz», - dedi qala basshysy.
