Oqý-aǵartý ministri Juldyz Súleimenova mektep direktorlarynyń taǵaiyndalýy men atqarý merzimi týraly túsinikteme berdi, dep habarlaidy Dalanews.kz.
Onyń sózinshe, ministrdiń ózi direktorlardy eki jyl merzimge taǵaiyndaý jáne ony taǵy eki jylǵa uzartý múmkindigin qarastyratyn format usynǵan.
«Dostar, qazir qoǵamda eń qyzý talqylanyp jatqan taqyryptardyń biri — bul mektep direktorlarynyń taǵaiyndalýy jáne atqarý merzimi týraly. Men eki jyl jáne sol eki jylǵa pliýs taǵy eki jyl format usynǵan bolatynmyn. Men barlyq pikirlerdi oqyp jatyrmyn», – dep jazdy ministr.
Juldyz Súleimenova bir oqyrmannyń pikiri erekshe oilandyrǵanyn atap ótti. Atap aitqanda, mektep direktorlarynyń ómir boiyna taǵaiyndalýy jáne talantty, basqarýshylyq qabileti bar ustazdardyń direktor bolýyna múmkindik berý máselesi qozǵalǵan.
«Bir pikir boldy, iaǵni osyndai 8000 direktorlar olar ómir boiy taǵaiyndalyp júre me? Talantty, basqarýshylyq qabileti bar myqty ustazdardyń direktorlikke umtylýyna, soǵan túsýge jáne sol jerde direktor bolyp ózin kórsetýge múmkindik qandai degen bir oqyrmannyń kommentarii suraǵy meni de oilandyrdy», – dedi ol.
Ministr bul máselege qatysty óz ustanymyn ashyq jetkizdi. Onyń pikirinshe, mektep direktory – turaqty, ómir boiy atqarylatyn qyzmet emes, belgili bir merzimge beriletin basqarýshylyq missiia.
«Iá, meniń oiymsha, óte durys. Mektep direktory – ol ómir boiy atqaratyn laýazym emes. Ol belgili bir kezeńge berilgen basqarýshylyq missiia», – dep jazdy Súleimenova.
Sondai-aq ol álemdik úzdik tájiribelerge toqtalyp, Singapýr, Ońtústik Koreia jáne Finliandiiadaǵy mektep direktorlarynyń rotatsiiasynan keiingi qyzmet jolyn mysalǵa keltirdi.
«Sondyqtan álemdegi eń úzdik tájiribeler – ol Singapýr, ol ońtústik Koreia, ol Finliandiia memleketterinde jalpy mektep direktorlarynyń rotatsiiasynan keiin olar qaida barady? Olar kóp jaǵdaida mentor bolady, nemese kóp jaǵdaida ákimshilik ortalyqtardy basqarady jáne mektepti basqarýǵa bailanysty jaqsy lektor retinde aiqyndalady», – dedi ministr.
Oqý-aǵartý ministri Qazaqstanda da osy tájiribeni zertteý qajettigin atap ótti. Onyń aitýynsha, basty maqsat – basqarýshylyq áleýeti bar talantty ustazdarǵa mektep basqarýyna jol ashý.
«Meniń oiymsha, biz bul tájiribeni de zertteýimiz qajet dep sanaimyn. Ne sebepti? Óitkeni bizdiń aramyzda 400 myń orta bilim salasyndaǵy eń úzdik ustazdarymyzdy, eń talantty ustazdarymyzdy, basqarýshylyqqa qabileti bar ustazdarymyzdy, bilim júiesin, bilimniń sapasyn kóterýge myqty ózindik rýhy bar, kózqarasy bar, ustanymy bar ustazdardy mektep basqarýǵa jol ashýyna jaǵdai jasaýymyz qajet dep sanaimyn», – dep túiindedi Juldyz Súleimenova.
