– "Eldiń órkendep, kemeldengenin bilgiń kelse, jolyna qara" degen sóz beker aıtylmaǵan. Barys-kelis pen alys-beriste jol qatynastary aıryqsha mánge ıe. Erte kezderde jerimizdegi iri qalalardyń kóbisi Uly Jibek jolyn jaǵalaı qonys tepken. Qazirgi tańda qaınaǵan tirshilikter osyndaı kúre joldardyń boıynda shoǵyrlanǵan. Joldar shyn mánisinde ómirdiń ózegi, baqýatty tirliktiń qaınar kózi. Sondyqtan jol boıyndaǵy ınfroqurylymdyq nysandardy halyqaralyq talapqa saı etip salýymyz kerek. Sonda óńirimizge týrıser kóbeıetin bolady, – dedi aımaq basshysy Janseıit Qanseıituly.
Sondaı-aq ákim, birneshe myń shaqyrymdy artqa tastap shyǵatyn jolaýshylar úshin yńǵaıly bolý maqsatynda atalǵan jol boıyna beketter salýdy tapsyrdy. Iaǵnı, «Batys Eýropa – Batys Qytaı» jolynda bolashaqta janarmaı quıatyn beketter men dúkender, ashanalar, tipti shaǵyn motelder de boı kóteretin bolady.
Birqatar ýchaskelerinde paıda bolǵan aqaýlarǵa baılanysty joldyń bir jaq bóligi jabylyp, ekinshi jaǵynda jóndeý jumystary júrgizilýde. Qurylys jumystary tıisti dárejede atqarylmaý saldarynan qurylys-montajdaý jumystary belgilengen ýaqytta aıaqtalmaı sozylyp jatatynyn synǵa alǵan oblys ákimi bul jaǵdaı, jol-kólik oqıǵalarynyń artyp, adamdardyń mezgilsiz qaza bolýyna sebep bolyp jatqandyǵyn jetkizdi. Tıisti sala jetekshilerine merdiger mekemelermen jumysty kúsheıtýdi júktedi.
Halyqaralyq mańyzdaǵy joldardyń birshama bóliginiń sapasyz ne bolmasa jolaýshylar úshin yńǵaısyz jasalǵanyna toqtalǵan J.Túımebaev sheteldik merdiger mekemelerdiń basshylaryna joldy retke keltirý jumystaryn 1 qyrkúıekten keshiktirmeýdi tapsyrdy.
Aıta keteıik, halyqaralyq kólik dálizi Ońtústik óńirindegi barlyq eldi
mekenderdiń 70 paıyzyn kesip ótedi. Oblys boıynsha respýblıkalyq mańyzy bar avtojoldardyń jalpy uzyndyǵy 837 shaqyrymdy quraıdy, onyń ishinde «Batys Eýropa – Batys Qytaı» tranzıttik dálizi qurylysy úsh baǵytta 420 shaqyrymdy alyp jatyr.
OQO ákiminiń baspasóz qyzmeti
