– Sizderdi aýdannyń 90 jyldyq mereitoiymen shyn júrekten quttyqtaimyn! Sairam – Túrkistan oblysyndaǵy iri aýdandardyń biri sanalady. Aýdannyń óńirimizdegi óndiristik-ekonomikalyq áleýeti joǵary deýge tolyq negiz bar. Halqymyz úshin Sairamnyń orny bólek. Yqylym zamannan beri ata-babalarymyz qonys etken qutty ólkede el tarihyndaǵy eleýli oqiǵalar ótti. Mártóbede keleli keńester uiymdastyrylyp turǵan. Osy keńeste qazaqtyń qairatkerleri men bileri, kósemderi men sheshenderi ult taǵdyryna oń áser etetin bátýaly sheshimder qabyldaǵan. Qazaqtyń kóne qalasy Sairam týraly álem ǵalymdary men tarihshylary oi qozǵaǵan. Ataqty Mahmut Qashqaridyń eńbekterinde de Sairam jaily aitylady. Orta ǵasyrlarda qolóner men saýda ortalyǵy retinde tanylǵan Sairam búgin de óz biiginen túsken joq. Aýyl sharýashylyǵyna beiimdelgen aýdan qaita ýaqyt ótken saiyn órkendep ósip keledi. Atalmysh salada jalpy ónim kólemi 1991 jyly 1 mlrd. 227 mln. teńgeni qurasa, 2017 jyly 58 mlrd. teńgege jetken. 26 jyldyń ishinde 46 esege artyp otyr. Al, Táýelsizdiktiń alǵashqy jylynda 7422 tonna et óndirilse, byltyr bul kórsetkish 26 660 tonnaǵa jetken. Aýdannyń aýylsharýashylyq salasyn damytýǵa respýblikalyq biýdjetten 636,8 mln. sýbsidiia berilgen. Ekonomika damýynyń kórsetkishi sanalatyn shaǵyn jáne orta kásipkerlik salasy Sairam aýdanynda jaqsy damyǵan. 27 jyl buryn shaǵyn jáne orta kásipkerlik sýbektileriniń sany 3000-nan sál ǵana assa, ótken jylǵy esep boiynsha 13 myńnan asyp tústi. Olardyń óndirip jatqan ónimderi de qomaqty, – dedi Janseiit Qanseiituly.
