J.Túimebaev: «Elbasy maqalasy – memlekettik ideologiianyń ózegi»
Jiynǵa Ońtústik Qazaqstan oblysynyń ákimi J.Túimebaev, oblystyq máslihat depýtattary, aýdan,qala ákimderi, oblystyq basqarmalar, aýmaqtyq departament, quzyrly organ basshylary jáne oblys ardagerleri, ziialy qaýym men BAQ ókilderi jalpy sany 250-ge jýyq adam qatysty.
Aktiv otyrysyn júrgizip otyrǵan oblys ákimi J.Túimebaev búgingi jiynnyń kún tártibine toqtalyp, Elbasynyń keshegi jariialanǵan maqalasy – memlekettik ideologiiany anyqtaityn basty saiasi qujat bolyp tabylatynyn aitty.
– Prezidentimiz úshinshi jańǵyrý úderisteriniń maqsattary men mindetterin kóregendikpen naqtylai otyryp, endi rýhani jańǵyrýdyń Joldaýy ispetti dúniesin jariialap, sáýlesi bar sanalardy dúr silkindirip otyr. «Ótken ǵasyrdyń basty úsh ideologiiasy – kommýnizm, fashizm jáne liberalizm bizdiń kóz aldymyzda kúiredi» deidi Elbasymyz óziniń maqalasynda. Sondyqtan da, Kóshbasshy meńzegendei, búginde radikaldy ideologiialar ǵasyrynyń kelmeske ketkenin sanamyz arqyly birjolata moiyndaýymyz kerek, – dedi ákim.
Maqsat aiqyn, baǵytymyz belgili, ol – álemdegi eń ozyq otyz eldiń qataryna qosylý ekenin aitqan aimaq basshysy maqaladaǵy «Taiaý jyldardaǵy mindetter» degen ekinshi bóliminde Elbasymyz bárimizge, árbir qazaqstandyqqa naqtyly mindetter júktegenin atap ótti.
– Prezident naqty jobalar retinde birinshiden, qazaq tilin birtindep latyn álipbiine kóshirý, ekinshi, qoǵamdyq jáne gýmanitarlyq ǵylymdar boiynsha «Jańa gýmanitarlyq bilim. Qazaq tilindegi 100 jańa oqýlyq» jobasyn qolǵa alý, úshinshiden, «Týǵan jer» baǵdarlamasyn qolǵa alyp, onyń aýqymyn «Týǵan elge» ulastyrý, tórtinshiden, jalpyulttyq qasietti oryndar uǵymyn sanalarǵa sińirý úshin «Qazaqstannyń qasietti rýhani qundylyqtary» nemese «Qazaqstannyń kieli jerleriniń geografiiasy» jobasyn jasaý, besinshiden, mádeniettiń básekelestik qabiletin qalyptastyrý úshin «Jahandaǵy zamanaýi qazaqstandyq mádeniet» jobasyn iske asyrý, altynshydan, zamandastarymyzdyń jetistikter tarihyna nazar aýdarý úshin «Qazaqstandaǵy 100 jańa esim» jobasyn qolǵa alý belgilengen. Maqalada kórsetilgen mańyzdy máselelerdi jetik meńgerýge, búkil Ońtústik turǵyndaryna tereń túsindirýge tiispiz, – dedi J.Túimebaev oblys aktivimen bolan kezdesýde.
Sondai-aq, jiynda QR Prezidenti N.Á.Nazarbaevtyń «Bolashaqqa baǵdar: rýhani jańǵyrý» baǵdarlamalyq maqalasy boiynsha Halyqaralyq «Alash» syilyǵynyń laýreaty, jazýshy M.Baiǵut, M.Áýezov atyndaǵy Ońtústik Qazaqstan memlekettik ýniversiteti filologiia fakýltetiniń dekany, professor B.Tileýberdiev, Shymkent qalasy, Ybyrai Altynsarin atyndaǵy №65 mektep-gimnaziianyń direktory Q.Kádirbaeva, oblystyq «Iýjnyi Kazahstan» gazeti bas redaktorynyń orynbasary K.Ismailov óz pikirlerin bildirdi.
Elbasymyzdyń maqalasynda atap kórsetilgen máselelerdi negizge ala otyryp oblys ákimi oblystyń áleýmettik-ekonomikalyq damýy men saiasi turaqtylyqty qamtamasyz etýge bar kúsh – qairatymyzdy jumsaityn bolamyz dedi. Prezidentimizdiń maqalasynda aitylǵan oi-pikirlerdi júzege asyrýda jan-jaqty jumylýdy aitqan aimaq basshysy oblys ákiminiń orynbasary Ulasbek Sádibekuly men oblystyq ishki saiasat basqarmasyna maqalany nasihattaý boiynsha aǵymdaǵy jyldyń sońyna deiin oblystyq jáne aýdan, qalalyq deńgeide is-sharalar uiymdastyryp, jelilik keste ázirleýdi tapsyrdy.
Sonymen qatar, aimaq basshysy buqaralyq aqparat quraldarynda jan-jaqty túsindirý jumystaryn júrgizýdi, jańa tásilderdi paidalana otyryp, áleýmettik jelilerde jumysty kúsheitýdi aitty. Aktiv otyrysyn qorytyndylaǵan ákim Elbasymyzdyń bul maqalasyn nasihattaý, túsindirý, júzege asyrý – memlekettik organdarǵa ǵana emes, jalpy qoǵamǵa júktelgen mindet ekenin jetkizdi.
Otyrysta kún tártibindegi ekinshi másele – Elbasynyń «Qazaqstannyń Úshinshi jańǵyrýy: jahandyq básekege qabilettilik» atty Joldaýynyń oblysta júzege asyrylý barysy boiynsha oblys ákimi orynbasarlarynyń baiandamalary tyńdaldy.
OQO ákiminiń baspasóz qyzmeti
