جيىنعا وڭتۇستىك قازاقستان وبلىسىنىڭ اكىمى ج.تۇيمەبايەۆ، وبلىستىق ءماسليحات دەپۋتاتتارى، اۋدان،قالا اكىمدەرى، وبلىستىق باسقارمالار، اۋماقتىق دەپارتامەنت، قۇزىرلى ورگان باسشىلارى جانە وبلىس ارداگەرلەرى، زيالى قاۋىم مەن ب ا ق وكىلدەرى جالپى سانى 250-گە جۋىق ادام قاتىستى.
اكتيۆ وتىرىسىن جۇرگىزىپ وتىرعان وبلىس اكىمى ج.تۇيمەبايەۆ بۇگىنگى جيىننىڭ كۇن تارتىبىنە توقتالىپ، ەلباسىنىڭ كەشەگى جاريالانعان ماقالاسى – مەملەكەتتىك يدەولوگيانى انىقتايتىن باستى ساياسي قۇجات بولىپ تابىلاتىنىن ايتتى.
– پرەزيدەنتىمىز ءۇشىنشى جاڭعىرۋ ۇدەرىستەرىنىڭ ماقساتتارى مەن مىندەتتەرىن كورەگەندىكپەن ناقتىلاي وتىرىپ، ەندى رۋحاني جاڭعىرۋدىڭ جولداۋى ىسپەتتى دۇنيەسىن جاريالاپ، ساۋلەسى بار سانالاردى ءدۇر سىلكىندىرىپ وتىر. «وتكەن عاسىردىڭ باستى ءۇش يدەولوگياسى – كوممۋنيزم، فاشيزم جانە ليبەراليزم ءبىزدىڭ كوز الدىمىزدا كۇيرەدى» دەيدى ەلباسىمىز ءوزىنىڭ ماقالاسىندا. سوندىقتان دا، كوشباسشى مەڭزەگەندەي، بۇگىندە راديكالدى يدەولوگيالار عاسىرىنىڭ كەلمەسكە كەتكەنىن سانامىز ارقىلى ءبىرجولاتا مويىنداۋىمىز كەرەك، – دەدى اكىم.
ماقسات ايقىن، باعىتىمىز بەلگىلى، ول – الەمدەگى ەڭ وزىق وتىز ەلدىڭ قاتارىنا قوسىلۋ ەكەنىن ايتقان ايماق باسشىسى ماقالاداعى «تاياۋ جىلدارداعى مىندەتتەر» دەگەن ەكىنشى بولىمىندە ەلباسىمىز بارىمىزگە، ءاربىر قازاقستاندىققا ناقتىلى مىندەتتەر جۇكتەگەنىن اتاپ ءوتتى.
– پرەزيدەنت ناقتى جوبالار رەتىندە بىرىنشىدەن، قازاق ءتىلىن بىرتىندەپ لاتىن الىپبيىنە كوشىرۋ، ەكىنشى، قوعامدىق جانە گۋمانيتارلىق عىلىمدار بويىنشا «جاڭا گۋمانيتارلىق ءبىلىم. قازاق تىلىندەگى 100 جاڭا وقۋلىق» جوباسىن قولعا الۋ، ۇشىنشىدەن، «تۋعان جەر» باعدارلاماسىن قولعا الىپ، ونىڭ اۋقىمىن «تۋعان ەلگە» ۇلاستىرۋ، تورتىنشىدەن، جالپىۇلتتىق قاسيەتتى ورىندار ۇعىمىن سانالارعا ءسىڭىرۋ ءۇشىن «قازاقستاننىڭ قاسيەتتى رۋحاني قۇندىلىقتارى» نەمەسە «قازاقستاننىڭ كيەلى جەرلەرىنىڭ گەوگرافياسى» جوباسىن جاساۋ، بەسىنشىدەن، مادەنيەتتىڭ باسەكەلەستىك قابىلەتىن قالىپتاستىرۋ ءۇشىن «جاھانداعى زاماناۋي قازاقستاندىق مادەنيەت» جوباسىن ىسكە اسىرۋ، التىنشىدان، زامانداستارىمىزدىڭ جەتىستىكتەر تاريحىنا نازار اۋدارۋ ءۇشىن «قازاقستانداعى 100 جاڭا ەسىم» جوباسىن قولعا الۋ بەلگىلەنگەن. ماقالادا كورسەتىلگەن ماڭىزدى ماسەلەلەردى جەتىك مەڭگەرۋگە، بۇكىل وڭتۇستىك تۇرعىندارىنا تەرەڭ تۇسىندىرۋگە ءتيىسپىز، – دەدى ج.تۇيمەبايەۆ وبلىس اكتيۆىمەن بولان كەزدەسۋدە.
سونداي-اق، جيىندا ق ر پرەزيدەنتى ن.ءا.نازاربايەۆتىڭ «بولاشاققا باعدار: رۋحاني جاڭعىرۋ» باعدارلامالىق ماقالاسى بويىنشا حالىقارالىق «الاش» سىيلىعىنىڭ لاۋرەاتى، جازۋشى م.بايعۇت، م.اۋەزوۆ اتىنداعى وڭتۇستىك قازاقستان مەملەكەتتىك ۋنيۆەرسيتەتى فيلولوگيا فاكۋلتەتىنىڭ دەكانى، پروفەسسور ب.تىلەۋبەردييەۆ، شىمكەنت قالاسى، ىبىراي التىنسارين اتىنداعى №65 مەكتەپ-گيمنازيانىڭ ديرەكتورى ق.كادىربايەۆا، وبلىستىق «يۋجنىي كازاحستان» گازەتى باس رەداكتورىنىڭ ورىنباسارى ك.يسمايلوۆ ءوز پىكىرلەرىن ءبىلدىردى.
ەلباسىمىزدىڭ ماقالاسىندا اتاپ كورسەتىلگەن ماسەلەلەردى نەگىزگە الا وتىرىپ وبلىس اكىمى وبلىستىڭ الەۋمەتتىك-ەكونوميكالىق دامۋى مەن ساياسي تۇراقتىلىقتى قامتاماسىز ەتۋگە بار كۇش – قايراتىمىزدى جۇمسايتىن بولامىز دەدى. پرەزيدەنتىمىزدىڭ ماقالاسىندا ايتىلعان وي-پىكىرلەردى جۇزەگە اسىرۋدا جان-جاقتى جۇمىلۋدى ايتقان ايماق باسشىسى وبلىس اكىمىنىڭ ورىنباسارى ۇلاسبەك سادىبەك ۇلى مەن وبلىستىق ىشكى ساياسات باسقارماسىنا ماقالانى ناسيحاتتاۋ بويىنشا اعىمداعى جىلدىڭ سوڭىنا دەيىن وبلىستىق جانە اۋدان، قالالىق دەڭگەيدە ءىس-شارالار ۇيىمداستىرىپ، جەلىلىك كەستە ازىرلەۋدى تاپسىردى.
سونىمەن قاتار، ايماق باسشىسى بۇقارالىق اقپارات قۇرالدارىندا جان-جاقتى ءتۇسىندىرۋ جۇمىستارىن جۇرگىزۋدى، جاڭا تاسىلدەردى پايدالانا وتىرىپ، الەۋمەتتىك جەلىلەردە جۇمىستى كۇشەيتۋدى ايتتى. اكتيۆ وتىرىسىن قورىتىندىلاعان اكىم ەلباسىمىزدىڭ بۇل ماقالاسىن ناسيحاتتاۋ، ءتۇسىندىرۋ، جۇزەگە اسىرۋ – مەملەكەتتىك ورگاندارعا عانا ەمەس، جالپى قوعامعا جۇكتەلگەن مىندەت ەكەنىن جەتكىزدى.
وتىرىستا كۇن تارتىبىندەگى ەكىنشى ماسەلە – ەلباسىنىڭ «قازاقستاننىڭ ءۇشىنشى جاڭعىرۋى: جاھاندىق باسەكەگە قابىلەتتىلىك» اتتى جولداۋىنىڭ وبلىستا جۇزەگە اسىرىلۋ بارىسى بويىنشا وبلىس اكىمى ورىنباسارلارىنىڭ باياندامالارى تىڭدالدى.
وقو اكىمىنىڭ باسپا ءسوز قىزمەتى
