Sondaı-aq, sizdiń ereje buzǵanyńyz beınejazba quralyna, nemese radarǵa jazylsa, polısıa qyzmetkeri aldymen ony júrgizýshige kórsetýi kerek. Jol qozǵalysy týraly zańǵa 50-den asa ózgeris engizildi.
3 shildede Memleket basshysy Jol qozǵalysy máseleleri boıynsha keıbir zańnamalyq aktilerge túzetýler men tolyqtyrýlar engizý týraly zańǵa qol qoıdy. Ol qujat erteńnen bastap kúshine enedi. Jańa erejede jańalyq kóp. Máselen, merzimi ótken júrgizýshi kýáligin qaıtadan alý úshin burynǵydaı emtıhan tapsyrmaıdy. Sondaı-aq, kóligińizdi toqtatqan kezde jol ınspektorlarynyń áreketin vıdeoǵa túsirýge quqyńyz bar. Degenmen, keıbir erejer qatańdatyldy.
«Kólik quralyn mas kúıde basqarǵany úshin múgedekterdi kólik quraldaryn basqarý quqyǵynan 3 jylǵa aıyrý túrindegi ákimshilik jaýapkershilik engizildi. Jol belgilerimen nemese joldyń júrý bóligindegi tańbalarmen kórsetilgen talaptardy saqtamaǵany úshin aıyppul mólsheri 5-ten bastap 3 aılyq eseptik kórsetkishke qysqartyldy. Masań kúıin kýálandyrýdan ótýden bas tartqan úshin júrgizýshi kýáliginen aıyrý merzimi 2 jyldan 3 jylǵa deıin kóbeıtildi», – deıdi İshki ister mınıstrligi ákimshilik polısıa komıtetiniń bólim basshysy Nurseıit Ábishev.
Taǵy bir ózgeris. Kóligińizdi toqtatqan kezde jol-patrýldik polısıa qyzmetkerleri qasyńyzǵa kelip, ózin tanystyrǵan soń, ne úshin toqtatqanyn túsindirý kerek. Sizdiń ereje buzǵanyńyz beınejazba quralyna, nemese radarǵa jazylsa, polısıa qyzmetkeri aldymen ony júrgizýshige kórsetýi kerek. Aıtpaqshy, endi ınspektordyń ruqsatynsyz kólikten shyǵa berýge bolady.
Jalpy aıyppuldy azaıtý máselesin byltyr depýtat kezinde Muhtar Tinikeev kóterip edi. Ózi ketse de onyń usynysy eskerýsiz qalmapty.
Qala ishinde arnaıy velojolaq salynbasa da, velosıpedshilerge de talap kúsheıdi. Olarǵa jaıaý júrginshi jolaǵymen júrýge qatań tıym salyndy. Iaǵnı jetektep ótýi tıis. Jalpy jol erejesine bas aıaǵy 50-den asa ózgeris engizilip otyr.
Derekkózi: nur.kz
https://dalanews.kz/19752
