Festıvál QR Mádenıet jáne sport mınıstrliginiń uıymdastyrýymen ótedi. «Jyr alyby – Jambyl» festıvaline ónerge qushtar, shyǵarmashylyqtyń dańǵyl jolyna qadam basqan jas mýzykanttar qatysady. Qatysýshylar Instagram, YouTube, Facebook áleýmettik jelileri arqyly irikteldi.
Qazaqstan halqy assambleıasynyń etnomádenı birlestikteri ókilderi arasynda orys, belorýs, ózbek, uıǵyr jáne basqa etnostar bar. İrikteý kezinde qatysýshylardyń artısik sheberligine, sóz saptaýyna, mátin ıdeıasynyń ereksheligine, vokaldyq qabiletterinebasa mán berildi.
Kyle Ruh, Ziruza, Ray, Nei1tron, Madi Rymbaev, Soulbirkez, Esko – olardyń esimderi qazir jastar arasynda tanymal. Osy ártisterdiń árqaısysy ónerdegi erekshe jetistikterimen bólise alady. Bul, óz aldyna, shyǵarmashylyq jolyna endi qadam basqan jas talanttar úshin jaqsy úlgi bolmaq. «Jańa janr túrlerin ıgerip, udaıy izdenis ústinde júretin jas ári daryndy mýzykanttardyń» ónerdegi jetistikteri jetip artylady. Memleket basshysy Q.Toqaev óziniń Joldaýynda aıtqandaı, Qazaqstan mádenıeti sol jas daryndardyń arqasynda jahandyq deńgeıde tanylyp júr.
«Jyr alyby – Jambyl» festıvali aqynnyń 175 jyldyǵyna arnalady. Kezinde Jambyl kótergen ózekti taqyryptardy búginde qazaqstandyq jas reperler kóterip, jańa formatta usynýda. Sondyqtan aqynnyń týyndylary áli kúnge deıin ózektiligin joǵaltpady.
Jańa festıváldiń maqsaty –Jambyldyń shyǵarmashylyǵyn nasıhattaı otyryp, jas talanttardy qoldaý, Qazaqstan aımaqtary arasynda kásibı-shyǵarmashylyq baılanysty nyǵaıtý.
Uıymdastyrýshylardyń aıtýynsha, jastardyń zamanaýı sýbmádenıeti múlde jańa sıpatta usynylatyn bolady jáne elimizdiń mýzykalyq dástúrlerimen baılanysyn kórsetedi.
Festıváldiń gala-konserti 20 qarasha kúni Almaty qalasyndaǵy Ó.Joldasbekov atyndaǵy stýdentter saraıynda ótedi.
