Sarbazdyń anasy Aizada Dospanovanyń aitýynsha, balasynyń sońǵy 4 jylda densaýlyǵynda eshqandai kinárat bolmaǵan.
Qyzylorda oblysy, Syrdariia aýdany, Aidarly aýylynyń turǵyny Aizada Dospanova alty balanyń anasy. Onyń aitýynsha, balasy Saiat ásker qataryna ótpes buryn úsh ret meditsinalyq tekserýden ótken. 25 qyrkúiek kúni áskerge alynǵan. Sodan tórt kún ótkennen keiin aýyrǵan.
“Habardy estigen boida Almaty oblysy, Úsharaldaǵy shekarashylar áskeri bólimine tarttym. Jolǵa qarajatym bolmaǵandyqtan, sińilimniń atynan kredit alýǵa májbúr boldym”, – dedi anasy Aizada Dospanova.
Onyń aitýynsha, 4 qazan kúni Úsharaldaǵy áskeri bólimge barǵan kezde ondaǵylar "balań munda joq" dep, ishke kirgizbesten qaitaryp jibergen. Sondai-aq, sol jerde elordadan kelgen joǵary shendi ofitser "balań Almatyda, gospitalda jatyr, sol jaqqa bar" dep aitqan.
“Úsharaldaǵy áskeri bólim qaqpadan qaitardy. Basqa barar jerim bolmaǵan soń óz qaltamnan qarjy shyǵaryp, sol mańnan qonaqúi jaldap jattym”, – dedi Aizada Dospanova.
Barar jer, basar taýy qalmaǵan Saiattyń anasy balasy qyzmet etken áskeri bólimdegilerden eshqandai maman bailanysqa shyqpaǵanyn aityp ashyndy. Alǵashqy habardyń ózin ǵalamtor men áleýmettik jelilerge taralyp ketken videodan kórgen.
“Balam keshe dárigerlerdiń telefonynan habarlasty. "Búitken armiiasy qurysyn" dedi. Ýaiymdap júregim aýyryp otyr”, – deidi anasy Aizada Dospanova.
Onyń aitýynsha, dárigerler balaǵa qandai dári berip, em-dom jasap jatqany týraly eshteńe aitpaǵan.
“Dárigerlermen sóileskenimde balanyń diagnozy belgisiz, arnaiy komissiia sheshedi, oǵan deiin bala bizde bolady. 25 qazan kúni balamdy ózderi aýylǵa aparyp beremiz degen”, – deidi Aizada Dospanova.
Sondai-aq, Saiat anasyna janynda áskeri boryshyn ótep jatqan taǵy bir qyzylordalyq sarbaz da áskerden bas tartyp, úige qaitqysy keletinin aitqan.
Saiattyń anasy Aizada Dospanova áskerde bar bolǵany 4 kún ǵana boryshyn ótegen balasynyń aldaǵy taǵdyryna alańdap otyr. Sebebi, ol óziniń foto, videosynyń ǵalamtorǵa taralyp, búkil elge tarap ketkendiginen beihabar deidi.
“Basqalardyń kúlkisine qalyp, shydamai balam ózine qol salsa, qaitemin? Videony túsirgenderdi sotqa tartamyn. Balamnyń densaýlyǵynda kináraty bolsa, tekserýden nege ótkizgen? Nege áskerge jaramdy dep sheshim shyǵarǵan?”, – dedi anasy Aizada Dospanova.
