ساربازدىڭ اناسى ايزادا دوسپانوۆانىڭ ايتۋىنشا, بالاسىنىڭ سوڭعى 4 جىلدا دەنساۋلىعىندا ەشقانداي كٸنەرات بولماعان.
قىزىلوردا وبلىسى, سىردارييا اۋدانى, ايدارلى اۋىلىنىڭ تۇرعىنى ايزادا دوسپانوۆا التى بالانىڭ اناسى. ونىڭ ايتۋىنشا, بالاسى سايات ەسكەر قاتارىنا ٶتپەس بۇرىن ٷش رەت مەديتسينالىق تەكسەرۋدەن ٶتكەن. 25 قىركٷيەك كٷنٸ ەسكەرگە الىنعان. سودان تٶرت كٷن ٶتكەننەن كەيٸن اۋىرعان.
“حاباردى ەستٸگەن بويدا الماتى وبلىسى, ٷشارالداعى شەكاراشىلار ەسكەري بٶلٸمٸنە تارتتىم. جولعا قاراجاتىم بولماعاندىقتان, سٸڭٸلٸمنٸڭ اتىنان كرەديت الۋعا مەجبٷر بولدىم”, – دەدٸ اناسى ايزادا دوسپانوۆا.
ونىڭ ايتۋىنشا, 4 قازان كٷنٸ ٷشارالداعى ەسكەري بٶلٸمگە بارعان كەزدە ونداعىلار "بالاڭ مۇندا جوق" دەپ, ٸشكە كٸرگٸزبەستەن قايتارىپ جٸبەرگەن. سونداي-اق, سول جەردە ەلوردادان كەلگەن جوعارى شەندٸ وفيتسەر "بالاڭ الماتىدا, گوسپيتالدا جاتىر, سول جاققا بار" دەپ ايتقان.
“ٷشارالداعى ەسكەري بٶلٸم قاقپادان قايتاردى. باسقا بارار جەرٸم بولماعان سوڭ ٶز قالتامنان قارجى شىعارىپ, سول ماڭنان قوناقٷي جالداپ جاتتىم”, – دەدٸ ايزادا دوسپانوۆا.
بارار جەر, باسار تاۋى قالماعان ساياتتىڭ اناسى بالاسى قىزمەت ەتكەن ەسكەري بٶلٸمدەگٸلەردەن ەشقانداي مامان بايلانىسقا شىقپاعانىن ايتىپ اشىندى. العاشقى حاباردىڭ ٶزٸن عالامتور مەن ەلەۋمەتتٸك جەلٸلەرگە تارالىپ كەتكەن ۆيدەودان كٶرگەن.
“بالام كەشە دەرٸگەرلەردٸڭ تەلەفونىنان حابارلاستى. "بٷيتكەن ارميياسى قۇرىسىن" دەدٸ. ۋايىمداپ جٷرەگٸم اۋىرىپ وتىر”, – دەيدٸ اناسى ايزادا دوسپانوۆا.
ونىڭ ايتۋىنشا, دەرٸگەرلەر بالاعا قانداي دەرٸ بەرٸپ, ەم-دوم جاساپ جاتقانى تۋرالى ەشتەڭە ايتپاعان.
“دەرٸگەرلەرمەن سٶيلەسكەنٸمدە بالانىڭ دياگنوزى بەلگٸسٸز, ارنايى كوميسسييا شەشەدٸ, وعان دەيٸن بالا بٸزدە بولادى. 25 قازان كٷنٸ بالامدى ٶزدەرٸ اۋىلعا اپارىپ بەرەمٸز دەگەن”, – دەيدٸ ايزادا دوسپانوۆا.
سونداي-اق, سايات اناسىنا جانىندا ەسكەري بورىشىن ٶتەپ جاتقان تاعى بٸر قىزىلوردالىق سارباز دا ەسكەردەن باس تارتىپ, ٷيگە قايتقىسى كەلەتٸنٸن ايتقان.
ساياتتىڭ اناسى ايزادا دوسپانوۆا ەسكەردە بار بولعانى 4 كٷن عانا بورىشىن ٶتەگەن بالاسىنىڭ الداعى تاعدىرىنا الاڭداپ وتىر. سەبەبٸ, ول ٶزٸنٸڭ فوتو, ۆيدەوسىنىڭ عالامتورعا تارالىپ, بٷكٸل ەلگە تاراپ كەتكەندٸگٸنەن بەيحابار دەيدٸ.
“باسقالاردىڭ كٷلكٸسٸنە قالىپ, شىداماي بالام ٶزٸنە قول سالسا, قايتەمٸن? ۆيدەونى تٷسٸرگەندەردٸ سوتقا تارتامىن. بالامنىڭ دەنساۋلىعىندا كٸنەراتى بولسا, تەكسەرۋدەن نەگە ٶتكٸزگەن? نەگە ەسكەرگە جارامدى دەپ شەشٸم شىعارعان?”, – دەدٸ اناسى ايزادا دوسپانوۆا.
