Almaty oblystyq basqarmalarynyń qyzmetkerleri QR Memlekettik rámizderine qurmet kórsetip, ánurandy oryndady. Aktsiiaǵa eresek qatysýshylardan basqa balabaqshalar men mektep qabyrǵasyndaǵy búldirshinder qatysty.
Almaty oblysy ishki saiasat basqarmasynyń basshysy Rahmet Esdáýletovtiń aitýynsha, mundai patriottyq aktsiiany ásirese jastar úshin ótkizý óte mańyzdy.
– Bul is-shara jas urpaqtyń Otanǵa, elimizdiń memlekettik rámizderine degen súiispenshiligi men qurmetin oiatady. Tý, Eltańba, Ánuran-bizdiń ortaq igiligimiz, bolashaqqa senim uialatady. Olar-qazaqstandyq patriotizmdi qalyptastyrýdyń qainar kózderi. Biz memlekettik rámizderimizdi qasterlep, óskeleń urpaqty óz eliniń tarihyn, onyń jeńisterin qurmetteýge jáne olardy maqtan etýge úiretýimiz kerek, – dedi óz sózinde.
Bul kúni elimizdiń basty memlekettik rámizderiniń birine Panfilov jáne Jambyl aýdandarynyń turǵyndary erekshe qurmet kórsetti. Mereke kúni, Jambyl aýyldyq okrýginde 6 metrlik týtuǵyr ornatylsa, Turpan aýylynda atalǵan nysannyń biiktigi 13 metrge deiin jetkizilip, onda da kók bairaǵymyz kókke kóterildi.
Budan basqa, taldyqorǵandyq jas sýretshiler Memlekettik rámizder kúnine orai «Obektivtegi ART álem» baiqaýynda qylqlamynan týyndaǵan kórkem sýretterde ózderiniń patriottyq kózqarastaryn bildirdi. Is-shara barysynda № 45 balabaqshanyń búldirshinderi QR Ánuranyn oryndady. Is-sharany Almaty oblysy ishki saiasat basqarmasynyń "Jetisý media" KMM uiymdastyrdy.
Óz kezeginde, "Qoǵamdyq kelisim" KMM memlekettik týdy qus ushatyn biiktikke áýe sharymen kóterip, qasterledi.
Ótkizilgen barlyq is-sharalar halyqtyń boiynda adamgershilik-patriottyq sezimdi tárbieleidi, memlekettik rámizderge degen súiispenshilik pen qurmettiń artýyna yqpal etedi.
