Mereke aldymen «Bulaq kórseń, kózin ash» degen támsilmen qala syrtyndaǵy bulaqtyń kózin ashýdan bastaldy. «Jastar» Sport saraiynyń aýmaǵynda qaz qatar tigilgen aq shańqan kiiz úiler «Naýryz aýylyn» qurap, úilerdiń aldynda qazaq halqynyń salt-dástúrlerinen kórinister qoiylyp, án men jyrdan shashý shashyldy, aq tilekter aitylyp, bata berildi. Qolóner buiymdarynan, kórkemsýretten kórmeler qoiylyp, qazaqsha kúres, kir tasyn kóterý, arqan tartys, asyq siiaqty ulttyq oiyndar oinaldy. Etnomádeni ortalyqtardyń da kórmesi, ulttyq taǵamdary usynylyp, shaǵyn kontsertteri qoiyldy. Tsirk ónerpazdary san qily ónerlerin pash etti.
Oblys basshysy aqsaqaldarmen, «Jasyl el» jasaǵynyń múshelerimen birge saiabaq ishine aǵash ekti.
Saiabaq sahnasynda B. Rimova atyndaǵy drama teatrynyń, oblystyq Súiinbai atyndaǵy filarmoniianyń jáne basqa da óner ujymdarynyń qatysýymen «Kúlimde, Naýryz, kúlimde!» atty mýzykalyq-horeografiialyq kórinis qoiyldy. Onda tabiǵattyń oianýy sýrettelip, ázil ánder, Naýryz jyry, Naýryz batasy aityldy.
Saltanatty merekede sóz sóilegen oblys ákimi Amandyq Batalov Elbasynyń «Prezidenttiń 5 áleýmettik jobasy» úndeýiniń halyqqa tyń serpin bergenin atap ótip:
– Ulystyń uly kúni, jaqsylyqtyń jarqyn merekesi, Jyl basy – Naýryz meiramy qutty bolsyn! Ulys oń, aq mol bolsyn! Qazynaly qarttar, jalyndy jastar, baqytty sábilerimiz aman bolsyn! Kúlli shyǵys jurtyna ortaq – Naýryz merekesiniń tarihy tym tereńde jatyr. Halqymyz Ulystyń uly kúninde – Jańa jylǵa úlken úmit artady. Sebebi naýryz aiy jańarý men jańa istiń, yryc pen yntymaqtyń altyn arqaýy sanalǵan. Bereke men birliktiń bastaýy bolǵan bul merekede barsha jetisýlyqtarǵa, ár shańyraqqa baqyt, qýanysh tileimin. Táýelsizdik tuǵyry berik bolyp, el abyroiy arta besin! – dedi óz quttyqtaýynda.
Munan soń oblys ákimi A. Batalov jetisýlyqtardyń atynan qazaq ǵaryshkeri, Halyq qaharmany, Áskeri-áýe kúshteriniń general-maiory Aidyn Aiymbetovti quttyqtap, oǵan «Almaty oblysynyń Qurmetti azamaty» ataǵyn resmi túrde tabystady.
Mereke Súiinbai atyndaǵy oblystyq filarmoniianyń, «Taldyqorǵan áýenderi» folklorlyq-etnografiialyq ansambliniń jáne qazaq estradasy ónerpazdarynyń kontsertimen jalǵasty.
Atap ótsek, osy kúni «Taldyqorǵan» ippodromynda kókpar jarysy ótti. Al keshkilik «Jastar» saiabaǵynda bi keshi uiymdastyrylady.
Almaty oblysy ákiminiń baspasóz qyzmeti
