Jetisýlyqtar kóktemniń alǵashqy kúnin "raqmet" sózimen qarsy aldy
«Almaty oblysynyń qurmetti turǵyndary! Sizderdi kóktemniń alǵashqy merekesi – Alǵys aitý kúnimen shyn júrekten quttyqtaimyn!
Bul mereke elimizdegi tatýlyq pen birlikti, izgilik pen qaiyrymdylyqty, dostyq pen aq nietti, ystyq yqylasty dáripteýimen erekshelenedi. Osy mereili kúnde ata-anamyzǵa, jaqyndarymyzǵa, ustazdarǵa, dárigerlerge, tártip saqshylaryna, kórshilerge, áriptesterge, el igiligi úshin ter tógip júrgen barlyq mamandyqtyń qyzmetkerlerine shyn júrekten alǵys aitýmen bolaiyq!
Alǵys aitý – otbasyn yntymaqqa, kórshini dostyqqa, halyqty birlikke, eldi tatýlyqqa bastaityn mereili mereke.
1 naýryz – Alǵys aitý kúninde barsha jetisýlyqtarǵa zor densaýlyq, baiandy baqyt, aýyzbirshilik tileimin! Árdaiym qoldaý tanytyp, qiyn-qystaý sátte judyryqtai jumyla bilgen oblys turǵyndaryna shyn júregimnen alǵysymdy bildiremin!» - delingen ákim quttyqtaýynda.
Sondai-aq, Alǵys aitý kúnin merekeleý aiasynda Bastóbe taýynyń eteginde Qaratal aýdanynda "qazaq halqyna myń alǵys" monýmentiniń janynda saltanatty miting ótti. Jyl saiynǵy is-shara qazaq halqyna alǵys aitý eskertkishine gúl shoqtaryn qoiýdan bastaldy.
Al mereke qarsańynda túrli ult ókilderi Taldyqorǵannyń qoǵamdyq kóliginde patriottyq ánder shyrqady. Erekshe quttyqtaýdy "Jetisy Media" jáne "Qoǵamdyq kelisim" KMM birlesip uiymdastyrdy.
Merekeniń qundylyǵyn jas animatsiialyq sýretshi Merei Kitapov óz shyǵarmashylyǵy arqyly jetkizdi. Qiyn ýaqytta qazaq halqy kóptegen etnikalyq toptar úshin pana boldy. Qazaq dalasy tynyshtyq pen birliktiń simvolyna ainaldy.
