E. Balfanbaevtyń aitýynsha, joba aiasynda 12 aspaly jol, uzyndyǵy 31 shaqyrym bolatyn taý shańǵy trassasy, sol siiaqty 700 tósek-oryndyq qonaq úi, meiramhanalar, kafe jáne basqa da nysandar salý kózdelgen. Kelýshiler sany jylyna 724 myń adam, iaǵni kúnine 12 myń adam bolady dep kútilýde. 600-den astam jańa jumys orny qurylyp, tartylatyn investitsiia kólemi 31 mlrd. teńge bolady dep mejelenip otyr. Keshenniń basty ereksheligi – onyń jyl boiy úzdiksiz jumys isteitindiginde.
– Taý shańǵy kýrortynyń jumysy jyl maýsymdaryna táýeldi emes. Qysqy kezeńde taý shańǵysy, hokkei, konkimen syrǵanaý qyzyq bolsa, jazda velosiped teýip, atqa minýge bolady. Iaǵni shańǵy joldary jazda velosiped joly retinde paidalanylady. Sóitip kýrort týristerdiń jyl boiy demalýyna qolaily oryn bolmaq, – deidi E. Balfanbaev.
Oblys ákimi Amandyq Batalov týrizmdi damytý josparlanǵan jumystyń basym baǵyttarynyń biri ekenin atap ótti:
– Almaty oblysyna kúni keshe jasaǵan saparynda Memleket basshysy óńirdiń týristik áleýetin tiimdi paidalanyp, týrizmdi, sonyń ishinde taý týrizmin damytýǵa nazar aýdarýdy tapsyrdy. Búgin tanystyrylǵan taý shańǵy kýrortynyń jobasy osy mindetti oryndaýda asa mańyzdy dep esepteimin. Onyń jumysy jappai týrister tartý isine yqpal etetin bolady. Oǵan qosa jańa jumys oryndary ashylyp, investitsiia tartylady, eń bastysy halyqty salamatty ómir saltyna tartýǵa járdemdesedi, – dedi A. Batalov.
Oblys ákimi injenerlik infraqurylymdardy damytý máseleleri jaǵynan qoldaý kórsetiletinin aitty. Bul, atap aitqanda avtokólik joldaryna, elektrmen, sýmen qamtýǵa jáne káriz júielerine qatysty.
Almaty oblysy ákiminiń baspasóz qyzmeti
