Jetisýda Elbasy tapsyrmasyn oryndaý jospary tanystyryldy
Jiynda ashqan oblys ákimi A. Batalov:
– Oblystyń áleýmettik-ekonomikalyq damýymen tanysyp, oń baǵalaǵan Memleket basshysy aýyl sharýashylyǵyn, kásipkerlikti, ásirese týrizmdi damytýǵa erekshe nazar saldy. Alakól kóli qazaqstandyqtardyń súiikti demalys ornyna ainalýy kerektigin aityldy, soǵan bailanysty infraqurylymdy damytýǵa airyqsha kóńil bólinedi. Jýyq arada Taldyqorǵan – Úsharal, Úsharal – Dostyq joldarynyń qurylysy bastalady, Úsharal qalasyndaǵy áýejaidyń ushý jolaqtary aýystyrylyp, iri áýe sýdnalaryn qabyldaýǵa ázirlenedi. Jaǵalaýdy bekemdeýge, tazartý qurylǵylaryn ornatýǵa, arnaiy kommýnaldyq qyzmet qurý isine mańyz berý kerek. Bizge naqty usynystar qajet. Ár joba búgingi zaman talaptaryna sáikes bolýy tiis, – dep atap ótti.
Aýdan, qala ákimderine jumysty shiratý qajettigin eskerte kele:
– Aýdandar damýynyń ara qatynasyndaǵy teńgerimsizdikti joiý kerek. Bul - bizdiń aldymyzǵa Memleket basshysy qoiyp otyrǵan mańyzdy mindet. Ol úshin ónerkásipti, shaǵyn jáne orta biznesti ásirese aýyldy jerlerde damytýymyz kerek. Aýyl sharýashylyǵy ónimderin óńdeý – basty baǵyttarymyzdyń biri bolyp qalýy tiis, – dedi A. Batalov.
Munan soń oblys ákiminiń orynbasarlary árqaisysy ózi jetekshilik etetin salalar jaiynda sóz etti.
Oblys ákiminiń birinshi orynbasary Lazzat Turlashov aýdan, qala ákimderine óz óńirlerinde júrgizilip jatqan qurylys jumystarynyń qarqyny men sapasyn erekshe nazarda ustaýdy tapsyrdy.
– Biryńǵai sáýlettik stildi saqtamai, turǵyn úiler qurylysyn bei-bereket júrgizip jatqandar da bar. Jeke turǵyn úi úshin berilgen ýchaskelerge áli kúnge úi salynbaǵan jaǵdailar da kezdesedi. Mundai jer ýchaskeleri qaitarylyp alynýy kerek. Osyndai jumystyń barlyǵyn aýdan, qala ákimderi baqylaýyna alýy tiis, – dedi L. Turlashov. Sondai-aq birinshi orynbasar azamattardyń mártebesin anyqtaý máselesine de nazar aýdaryp, Sarqan, Panfilov, Qaratal aýdandarynyń bul rette artta qalyp kele jatqanyn tilge tiek etti. «Turǵyn úi qurylysy, shaǵyn nesie berý, tótenshe jaǵdailardyń aldyn alý, áskerge shaqyrtý da únemi nazarda tursyn», – dedi ol.
Oblys ákiminiń orynbasary Serikjan Beskempirov negizinen eki máselege toqtaldy. Birinshiden, jyrtylǵan jerlerdiń elektrondy kartalaryn minagro.gov.kz veb-portalynyń elektrondy málimetter bazasyna engizý isin jyldamdatý kerektigin aitty. Sondai-aq jaiylym jerlerdi basqarý josparlaryn daiyndap, bekitýge de asyǵý kerek. Qazirgi kezde Qaratal, Panfilov, Sarqan aýdandary men Taldyqorǵan qalasynda osy josparǵa qatysty jumystar aiaqtalmaǵan. S. Beskempirov óz sózinde qaýipti shegirtkeler maýsymy bastalǵanyn da atap ótti. Sondyqtan jaǵdai baqylaýǵa alynyp, qaýip týdyrǵan oshaqtar bolsa, birden áreket etýge daiyn bolý kerektigi eskertildi.
Óńirdegi gazdandyrý, sanitarlyq tazalyq, jol jóndeý jumystary týraly oblys ákiminiń orynbasary Aidarbek Baijanov málimdedi. Onyń aitýynsha, sanitarlyq tazalyq jóninen Talǵar, Kerbulaq, Aqsý, Ile aýdandarynda kóp kemshilikter bar. Sonymen qatar Tekeli, Taldyqorǵan jáne Qapshaǵai qalalarynda jolaýshy tasymalyn sýbsidiialaý men elektorndy bilet júiesin engizý negizgi máselelerdiń biri bolyp otyr. Avtobýs baǵyttaryn retteýge, arnaiy turaqtar qoiýǵa mán berý kerek.
Osy jyly ashý josparlanǵan shaǵyn jáne orta biznestiń 100 nysanynyń qazirgi kezde 12-si ǵana ashylǵan. Bul baǵytta Aqsý, Panfilov, Ile, Kerbulaq aýdandary men Qapshaǵai qalasy belsendi jumys isteýde. Basqa aýdan, qalalar osy isti shiratýy tiis. Bul týraly oblys ákiminiń orynbasary Jeńis Tuiaqov aitty. Aýmaqty damytý, «Biznestiń jol kartasy - 2020» baǵdarlamalary boiynsha da tiianaqty jumys qajet. Indýstrialdy aimaqtar men ónerkásiptik alańdardy damytý máselesi qashanda basym baǵyttardyń qatarynda bolýy kerek.
Áleýmettik salaǵa kelsek, barlyq qajetti materialdar bola tura «Prezidenttiń 5 áleýmettik bastamasy» boiynsha túsindirý jumystary aýdandarda baiaý júrýde.
«Rýhani jańǵyrý» baǵdarlamasyn júzege asyrý, stýdentterge jataqhana salý, UBT-ǵa daiyndyq jáne ony ótkizý, balalardyń jazǵy demalysyn uiymdastyrý t.b. máseleler oblys ákiminiń orynbasary Jaqsylyq Omardyń baiandamasyna negiz boldy.
Jiyn sońynda oblys ákimi Amandyq Batalov osy aitylǵan máselelerdiń barlyǵyn da airyqsha baqylaýǵa alý qajettigin aitty. «Oblystaǵy jumys istep turǵan bazarlardy retke keltirý - kezek kúttirmeitin másele. Oǵan qosa jol jiegindegi qyzmet kórsetý nysandarynyń talapqa sai bolýy da umyt qalmaýy tiis», - dedi A. Batalov.
– Memleket basshysynyń tapsyrmalaryn júzege asyrý jónindegi is-sharalar jospary daiyndalyp bekitildi. Bul jospar qazir aýdan, qala ákimderi men basqarma basshylarynyń qoldaryna beriledi. Óz jumystaryńyzdy osy josparǵa sáikestendirýlerińiz kerek. Munda Alakól mańy, sútti jáne etti mal sharýashylyǵy, baý-baqsha, ónerkásip, ShOB, jasyl energetika jáne basqa da baǵyttardy damytýdyń joldary, jaýapty tulǵalar men oryndaý merzimi aiqyn kórsetilgen. Endi bilek sybana iske kirisińizder, – dedi Amandyq Batalov.
Almaty oblysy ákiminiń baspasóz qyzmeti
